Хомусчут, ырыаһыт Айсен Аммосов Орто Халымаҕа кэнсиэртиэҕэ

Орто Халыма куоракка буолар ырыа-тойук киэһэтигэр Айсен Аммосов кыттыыны ылыаҕа. Санатан эттэххэ, аһымал кэнсиэркэ киирбит үп биһиги биир дойдулаахпытыгар Надежда Мишинаҕа күүс-көмө буолуоҕа.


Айсен Аммосов тарбахха баттанар эдэр бастыҥ виртуоз-хомусчуттартан биирдэстэрэ. Кини кыра сааһыттан ыллыырын, тойуктуурун, оһуокайдыырын сөбүлүүр, кыралаан хомуска оонньуур.

Эдэр киһи Дьокуускайдааҕы М.Н.Жирков аатынан музыкальнай колледжка үөрэнэ сылдьан, Альбина Дегтярева салайар аатырбыт «Айархаан» этно-бөлөххө талыллан киирбитэ уонна 2012 сыллаахтан саха эстрадатын киэҥ сыанатыгар бастакытын тахсыбыта. Айсен Лейпциг (Германия), Пекин (Кытай), Астана (Казахстан), Сеул (Корея), Москуба курдук киэҥ куораттар сыаналарыгар оонньоон, улахан биһирэбил ылбыта. Быйыл регионнар икки ардыларынааҕы «Биир күн» этно-поп аныгы ырыа куонкурус түһүлгэтигэр смс-куоластааһын кыайыылааҕынан тахсыбыта.

Айсен Аммосов аҥардас ураты кэрэ, тупсаҕай, аныгылыы көстүүмнэрэ да көрөөччүнү тардар. Кини эдэрдии эрчимнээх, тэтимнээх музыкатын истибит киһи күүһүгэр күүс, сэниэтигэр сэниэ эбинэр. Сири-сибиири бараабыт, эдэр саха виртуоз-хомусчута, ырыаһыта биһиги курдук ыраах сытар, уһук хоту улууска кэлэрэ сэдэх түбэлтэ.

Ааптар: Светлана ТАЛИБАЕВА

Добавить комментарий

Ваш e-mail не будет опубликован. Обязательные поля помечены *