Бүлүү улууһугар праймериз кыттыылаахтара сөбүлэһии түһэристилэр

Бүлүү улууһугар праймериз кыттыылаахтара сөбүлэһии түһэристилэр

Бүлүү улууһун икки нэһилиэгин баһылыктарын быыбардарыгар “Биир ньыгыл Арассыыйа” партия ыытар барыллаан быыбарын — праймериһин кыттыылаахтара сөбүлэһии түһэристилэр.


Туох туһунан? “Биир ньыгыл Арассыыйа” партия барыллааһын быыбарыгар кыттар кандидаттар праймериз да кэннэ бэйэ-бэйэлэригэр өйөбүл, тирэх буолалларын, салгыы быыбарга кандидатураларын туруорбаттарын, бииргэ үлэлииллэрин туһунан сөбүлэһии түһэристилэр.

Быйыл күһүн Бүлүү улууһун Өкүндү уонна I Тоҕус (Тыымпы) нэһилиэктэрин баһылыктара болдьохторун иннинэ боломуочуйаларын устуммуттарынан, бу нэһилиэктэргэ ахсынньы ый бүтүүтэ муниципальнай таһымнаах быыбардар тэриллиэхтэрэ.

Үгэс курдук, “Биир ньыгыл Арассыыйа” ыытар праймериһигэр улууска, нэһилиэккэ биллэр, кыахтаах кандидаттар кытталлар.

I Тоҕус нэһилиэгин баһылыгын праймериһигэр кыттар улуус дьаһалтатын отделын салайааччыта Аксинья Кудайбердыева уонна оройуон Сэбиэтин депутата Акимар Михайлов сэтинньи 8 күнүгэр быыбардааччыларын кытта көрүстүлэр. Оҕо уһуйааныгар, гимназияҕа, дьаһалтаҕа буолбут көрсүһүүлэргэ 50 тахса быыбардааччы кыттан праймериз туһунан чуолкайдастылар, кандидаттар бырагыраамаларын билистилэр, элбэх ыйытык биэрдилэр, кандидаттарга накаастарын туруорустулар.

Өкүндүгэ тэриллэр праймериз бүллүтүөнүгэр салайар үлэҕэ уопуттаах Семен Протопопов, Бүлүү куоратын 2 №-дээх оскуолатын дириэктэрэ Михаил Новиков уонна олохтоох дьаһалта тыа хаһаайыстыбатын исписэлииһэ Никифор Петров кандидатуралара киирдилэр.

Кандидаттар сэтинньи 9 күнүгэр дьаһалтаҕа, оскуолаҕа, оҕо уһуйааныгар быыбардааччылары кытта көрсөн бырагыраамаларын билиһиннэрдилэр, көрүүлэрин кэпсээтилэр.

Көрсүһүүлэргэ оройуон Сэбиэтин бэрэссэдээтэлэ, партия улуустааҕы олохтоох салаатын салайааччы Гаврил Корякин праймериз туһунан иһитиннэриилэри оҥордо, элбэх ыйытыктары чуолкайдаата.

Партия Саха сиринээҕи исполкомун салайааччытын солбуйааччы Айталина Нестерова быыбардааччылар болҕомтолорун праймериз ыраастык, чиэһинэйдик ааһарыгар хатаата.

Икки нэһилиэккэ праймериз сэтинньи 10 күнүгэр ыытыллыахтаах, барыллааһын быыбары ыытар хамыыһыйалар, бүллүтүөннэр бэлэмнэр.
Өкүндү, I Тоҕус нэһилиэктэрин быыбардааччыларын сэтинньи 10 күнүгэр праймеризка көхтөөх кыттыыны ыларгытыгар ыҥырабыт!

Ааптар: Николай Куприянов

Добавить комментарий

Ваш e-mail не будет опубликован. Обязательные поля помечены *