Ойуунускай пааматынньыгар сибэкки дьөрбөтүн уурдулар

Бүгүн сарсыарда Платон Ойуунускай төрөөбүтэ 125 сыллаах үбүлүөйүгэр Саха сирин уопсастыбаннаһа киниэхэ сүгүрүйэн, пааматынньыгар сибэкки дьөрбөтүн уурда.

Үөрүүлээх дьаһалга Ил Түмэн бэрэссэдээтэлэ Петр Гоголев, СӨ бырабыыталыстыбатын бэрэссэдээтэлэ Владимир Солодов, Судаарыстыбаннай сүбэһит Андрей Борисов, Саха сирин суруйааччыларын сойууһун бэрэссэдээтэлэ Наталья Харлампьева, бырабыыталыстыба чилиэннэрэ, норуот дьокутааттара, Таатта улууһун баһылыга Михаил Соров, уопсастыбаннас кыттыыны ыллылар.

Спикер Петр Гоголев Платон Ойуунускай үбүлүөйүнэн эҕэрдэлээн туран, Платон Алексеевич киһи быһыытынан үгүс өрүттээҕин бэлиэтээтэ.
— Сүдүттэн сүдү, чулууттан чулуу киһи үтүө холобура баар буоллаҕына, бу – Платон Ойуунускай. Кини Саха судаарыстыбаннаһын төрүттэспит дьоммутуттан биирдэстэрэ, өрөспүүбүлүкэбитин салайбыт, сэбиэскэй литератураны төрүттээбит, саха үгэһин, олоҥхотун үйэтиппит киһибит. Кини сүүс сыллаах улуу былааны суруйан, сайдыыбытыгар улахан олугу оҥорбута. Бу былаанынан билигин өрөспүүбүлүкэ сайдан иһэр. Өрөспүүбүлүкэбитин олохтообут дьоммут ааттарын үйэлэргэ хаалларан кэлэр кэнчээри ыччакка тиэрдиэхтээхпит, — диэн бэлиэтиир кини.

Премьер-миниистир Владимир Солодов Саха Өрөспүүбүлүкэтэ төрүттэммитэ 100 сыллаах үбүлүөйүгэр анаммыт, онно бэлэмнэнии үлэтэ бара турарын ахтан туран, судаарыстыбаннаһы төрүттэспит дьоммутун ахтан-санаан ааһыахтаахпытын, онтон тирэх ылыахтаахпытын бэлиэтээн эттэ.
— Судаарыстыбаннаһы төрүттэспит, култуураны, үгэһи, литератураны өрө туппут, сайыннарбыт киһинэн Платон Ойуунускай буолар. Кини хаалларбыт нэһилиэстибэтигэр билигин биһиги тирэҕирэн сайдабыт. Кини үлэтин-хамнаһын өссө да арыйыахпыт турдаҕа. Быйыл Платон Алексеевич үбүлүөйүгэр аналлаах тэрээһиннэр ыытылыннылар. Платон Ойуунускайтан биһиги үөрэнэрбит элбэх. Бастатан туран, күүстээх санаалаах, тулуурдаах, дьаныардаах буоларга үөрэтэр. Кини кыра нэһилиэккэ, дьадаҥы ыалга төрөөбүт киһи, үөрэҕи ылан судаарыстыбаны салайар киһи буола үүммүтэ. Кини – барыбаатылыстыба бастакы бэрэссэдээтэлэ буолан туран, судаарыстыбаны салайыыга үгэһи, култуураны, үөрэҕи билии, дойдуга бэриниилээх буолуу сайдыы төрдө буоларын дакаастаабыта.

Судаарыстыбаннай сүбэһит Андрей Борисов Платон Алексеевич Олоҥхону үйэтитиигэ сүҥкэн суолталааҕын бэлиэтээн туран, бүгүн Дьокуускайга “Триумфка” улахан тэрээһин буоларын, онно Куньцю Кытай операта “Туйаарыма Куотун” туруорарын иһитиннэрдэ. “Убайбыт Былатыан аан дойду үрдүнэн аата ааттанна, айар күүһэ тэнийдэ. Кини аата Азияттан, Европаҕа диэри иһиллэр. Кини “кэриэһим кэннибэр хааларым, кэхтибэт кэрэкэ тылларым” диэн этиитэ олус дириҥ ис хоһоонноох. Төрөөбүт сахатын тыла, улуу олоҥхото аатырда. Ол барыта кэлэр кэнчээри ыччакка хаалыаҕа”, — диэн этэр.

Сибэкки дьөрбөтүн уурууга Платон Алексеевич төрөөбүт-үөскээбит Тааттатын улууһуттан улахан дэлэгээссийэ кэлбит. Улуус баһылыга Михаил Соров Платон Ойуунускай сүдү талааннааҕын ааһан хорсун-хоодуот буойун буоларын, Сэбиэскэй былааһы олохтооһуҥҥа, автономияны ылыныыга ураты суолтатын ойуччу тутан бэлиэтээтэ.

Аграфена КУЗЬМИНА, “Саха сирэ” хаһыат, edersaas.ru