Эдьигээннэр Ойуунускайга аналлаах тэрээһиннэри нэһилиэктэринэн ыыттылар
Эдьигээннэр саха норуотун улуу уола Былатыан Ойуунускай төрөөбүтэ 125 сылын көрсө тэрээһиннэри ыыталлар. Бу күннэргэ нэһилиэк-нэһилиэк аайы бэйиэт хомоҕой хоһоонноро доргуйдулар, ылбаҕай ырыалара ылланнылар.
Кыстатыам нэһилиэгэр бу нэдиэлэ устата Ойуунускайга аналлаах декада ыытылла турар. Уһуйаан иитиллээччилэрэ, оскуола үөрэнээччилэрэ, улахан дьон кыттыылаах тэрээһиннэр тиһигин быспакка бараллар. Олохтоох бибилэтиэкэ, оскуола кэлэктиибэ көҕүлээһиннэринэн литературнай биэчэр, күрэхтэр, ааҕыылар, быыстапка элбэх дьону түмэ тартылар, Ойуунускай аатын ааттаттылар.
Баахынай нэһилиэгэр «Сайдам» ЭКК улэһиттэрин, култуура бэтэрээнэ, библиотекарь Васильева М.И. литературнай-художетственнай биэчэри ыыттылар. Манна П.А. Ойуунускай үс айымньытынан инсценировка туруордулар, хоһоон аахтылар итиэннэ «Сулустаах чаас» оонньуу бэрт сэргэхтик ааста.
Бэстээх нэһилиэгин «Сарыал» култуура киинигэр Былатыан Ойуунускайга аналлаах литературнай биэчэр буолан ааста. Тэрээһин улуу суруйааччы олоҕун нэһилиэк бибилэтиэкэрэ М.С. Далакырова кэпсээниттэн саҕаланна. Кини Платон Алексеевич хаартыскаларынан слайд оҥорон улахан экраҥҥа көрдөрдө. Оскуола саха тылын уонна литературатын учуутала А.Г. Матвеева «Түннүк» диэн Ойуунускай олоҕун, айар үлэтин туһунан викторина ыытта, манна элбэх оҕолоох ыал ийэтэ Екатерина Дмитриевна Бадаева кыайыыны ситистэ уонна өйдөбүнньүк бэлэҕи тутта.
Салгыы суруйааччы хоһооннорун доргуччу ааҕыы күрэҕэ буолла, манна математика учуутала Вероника Еремеевна Колесова бастакы миэстэни ылла уонна анал бирииһинэн наҕараадаланна. «Сарыал» сынньалаҥ киинин улэһиттэрэ П.А. Ойуунускай «Омуннаах оҕо» диэн кэпсээнинэн сыаҥка туруоран бу тэрээһини киэргэттилэр. Биэчэр устата Ойуунускай айымньыларын быыстапката, оҕолор уруһуйдара турдулар. Кэлбит ыалдьытгарга, оҕолорго «Дьулуруйар Ньургун Боотур» олоҥхоттон быһа тардан мультфильм көрдөрүлүннэ. Бу дьоро киэһээни оһуохайынан түмүктээтилэр.
Ааптар: Мария АПОЛЛОНОВА