«Саҥаны айааччы» номинацияҕа финалистары талыы саҕаланна

Бүгүҥҥүттэн, сэтинньи 19 күнүттэн, «Саха сирин киэн туттуута» норуот бириэмийэтигэр «Саҥаны айааччы» номинация биэс финалиһын талыыга куоластааһын саҕаланна. 

edersaas.ru

Номинацияҕа кыттарга 35 киһи сайаапкатын биэрдэ. Финалистарга куоластааһын сэтинньи 23 күнүгэр күнүс 16.00 ч. түмүктэниэҕэ. Кыайыылааҕы быһаарар куоластааһын  сэтинньи 26 күнүгэр буолуоҕа. «Саҥаны айааччы» номинация кыайыылааҕа сэтинньи 30 күнүгэр биллиэҕэ.

Сэтинньи 23 күнүгэр диэри  ФИНАЛИСТАРЫ ТАЛЫЫГА КУОЛАСТААҺЫН   GOLOS.YSIA.RU, Вконтакте, Instagram, Facebook СОЦИАЛЬНАЙ  СИТИМНЭРИНЭН ЫЫТЫЛЛЫАҔА.

Ахсынньы 9 күнүгэр Аҕа дойду Дьоруойдарын күннэригэр «Саха сирин киэн туттуута» норуот бириэмийэтин бырайыагын 12 номинациятын кыайыылаахтарын барыларын мунньан, үөрүүлээх быһыыга-майгыга чиэстээһин буолуоҕа. Ким туох боппуруостаах бырайыак ааптара Григорий Фоменкоҕа  89248635481 төлөпүөҥҥэ эрийэн билсиҥ.

«Саҥаны айааччы» номинацияҕа араас эйгэҕэ, норуот хаһаайыстыбатыгар туһуламмыт сонун сүүрээни, хамсааһыны күннээҕи олох таһымын тупсарыыга ылсан үлэлии сылдьар дьон  кытталлар. Быйыл бу  бүтэһик куонкурус.

Саҥаны, үйэлээҕи олоххо киллэрэ сылдьар дьон ахсаана элбэҕэ үөрдэр. Ол курдук, бу номинацияҕа олус элбэх киһи кыттаары сайаапка түһэрдэ. Онон аныгы үйэ буолан, олохпут таһыма биллэ тупсубута, дьон араас хайысханы тобулан, ситиһиилээхтик үлэлии  сылдьаллара көһүннэ.

«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр, интэриэстэригэр таба тайаммыт, үлэттэн, таптыыр дьарыктарыттан дьоллонор дьону кэмигэр бэлиэтээн көрүү буолар. Кинилэргэ махтал тылларын саамай үлэлэрин, айар-тутар кэмнэрин үөһүгэр сырыттахтарына этэн үөрдүү.

«Саха сирин киэн туттуута» норуот бириэмийэтин генеральнай спонсора — «Көмүлүөк» саха иһитин оҥорор фирма.

 

Елена ПОТОЦКАЯ, «Саха сирэ» хаһыат, edersaas.ru

 

 

0
0

Добавить комментарий

Ваш e-mail не будет опубликован. Обязательные поля помечены *