mediaБүгүн, сэтинньи 22 күнүгэр, Дьокуускай куорат федеральнай суутугар биллиилээх спортсмен, кикбоксиҥҥа аан дойду үс төгүллээх чөмпүйүөнэ, «Сатал» СОНТ бэрэссэдээтэлэ Иннокентий Макаровы өлөрбүт буруйдаахха суут уурааҕа таҕыста.
edersaas.ru
Суут быһаарбытынан, сууттанааччы Иннокентий Макаровтыын чааһынай дьиэ баанньыгар бииргэ арыгылаабыттар. Ол олорон, кыыһырсыы түмүгэр, Степанов Макаровы 14-тэн итэҕэһэ суохтук быһаҕынан анньан өлөрбүт.
Суут Владислав Степановы киһини соруйан өлөрүүгэ буруйдааҕынан билинэн, 9 сылга кытаанах эрэсиимнээх холуонньаҕа көҥүлүн быһарга уурда. Итиэннэ Степанов эмсэҕэлээччилэргэ 2 мөл. солк. моральнай хоромньу төлүөхтээх.
Оттон өлүгү кистээһиҥҥэ көмөлөспүт Острелины РФ Холуобунай кодексатын 316-с ыстатыйатынан буруйдааҕынан билинэн, 180 тыһ. солк. сууммалаах ыстараап төлүүргэ уурда.
Санатар буоллахха, Иннокентий Макаров 2017 сыл сэтинньи 5 күнүгэр сураҕа суох сүппүтэ. Сэтинньи 13 күнүгэр силиэстийэ уорганнара РФ Холуобунай кодексатын 105-с ыст. 1 чааһынан, ол эбэтэр, киһини соруйан өлөрүү бэлиэтэ баарынан, холуобунай дьыала тэрийбиттэрэ. Сэтинньи 22 күнүгэр Макаров өлүгүн Бүлүүлүүр суол ойууруттан булбуттара.
Бу ыар буруйу оҥорууга уорбаланааччыны 2017 сыл сэтинньи 22 күнүгэр туппуттара. Сарсыныгар, сэтинньи 23 күнүгэр, иккис уорбаланааччыны – өлүгү кистээһиҥҥэ көмөлөспүт киһини — туппуттара.
Дьыаланы силиэстийэлээһин бу дьыл ыам ыйын бүтүүтүгэр түмүктэнэн, суут көрүүтүгэр барбыта. Дьокуускай куорат федеральнай суутугар дьыаланы көрүү от ыйыттан саҕаламмыта.
Иннокентий аҕата Василий Макаров:
— Утуйа сытар киһини итинник кырыктаахтык өлөрөн баран, анаан-минээн өлөрө кэлэн баран, 9 эрэ сылга көҥүлэ быһыллыбытыгар биһиги олох сөпсөспөппүт. Степанов өлөрөрүнэн хаста да суоһурҕаммытын туһунан туоһулар көрдөрүүлэрэ болҕомтоҕо ылыллыбата. Острелин өлүгү кистээһиҥҥэ көмөлөһөн баран, көҥүлгэ хаалла. Иккиэн урут милииссийэҕэ үлэлээбит дьон, тугу оҥороллорун өйдүү-өйдүү оҥорбуттар. Бириигэбэри Үрдүкү суукка хайаан да ааһынабыт.
Бу дьыала туһунан сиһилии «Саха сирэ» хаһыат сэтинньи 28 күнүнээҕи нүөмэригэр «Бэрээдэк» балаһаҕа ааҕаарыҥ.
Вера МАКАРОВА, «Саха сирэ» хаһыат, edersaas.ru
Ааптар хаартыскаҕа түһэриилэрэ.
