Үөһээ Бүлүүгэ сылгыһыттар мунньахтаатылар

Сыспай сиэллээҕи иитии, элбэтии боппуруоһа өрөспүүбүлүкэ үрдүнэн  сытыытык турар. Бүгүн Үөһээ Бүлүү улууһугун сылгыһыттара дириҥ ис хоһоонноох киэҥ кэпсэтиини ыыттылар. Дьөһөгөй оҕотун элбэтиигэ уонна ыччат дьон төрүт дьарыкка сысталларыгар, сылгыһыт статуһун үрдэтиигэ аналлаах «төгүрүк остуол» ыытылынна.


Үөһээ Бүлүү сылгыһыттарын мунньаҕар улуус баһылыгын 1-кы солбуйааччы Семен Михалев, улуустааҕы баһылыктар сэбиэттэрин бэрэссэдээтэлэ Степан Дмитриев, тыа хаһаайыстыбатын департаменын салайааччы Родион Ефремов, нэһилиэктэр баһылыктара, сылгыһыттар, тэрилтэ салайааччылара кытыннылар. Мустубут дьон баар кыһалҕалары ырыттылар, инники былааннары торумнаатылар.

Мичил Иванов, Харбалаах нэһилиэгин сылгыһыта:
— Сылгыһыттарга аналлаах мунньах улууска аан маҥнайгытын тэрилиннэ. Олус сөптөөх тэрээһин буолла. Элбэх этиини иһиттибит. Сылгы ахсаанын элбэтиигэ бары өттүнэн сөптөөх усулуобуйа тэриллиэхтээҕин туһунан этиини сэргии иһиттим. Бу мунньах кэнниттэн улууска сылгыны иитиигэ, элбэтиигэ сөптөөх хамсааһын, үлэ ыытыллыа диэн эрэнэбин.

Тэрээһин бырагырааматын чэрчитинэн  «Идэhэ — 2018» ас-үөл дьаарбаҥката үлэлээтэ. Мунньах туһунан «Үөһээ Бүлүү» хаһыат кэлэр нүөмэригэр сиһилии билсиҥ.

Ааптар: «Үөһээ Бүлүү» хаһыат

Добавить комментарий

Ваш e-mail не будет опубликован. Обязательные поля помечены *