Хаҥаласка дьоҕус биисинэс кыһалҕаларын ырыттылар

Хаҥаласка дьоҕус биисинэс кыһалҕаларын ырыттылар

Хаҥаласка «Саргы түһүлгэтэ» КК киинигэр өрөспүүбүлүкэтээҕи «Бизнес-форум 2018. Ориентиры будущего» диэн түмсүү буолла. Манна Дьокуускайтан, Мэҥэ Хаҥаластан, Намтан, Чурапчыттан, Хаҥаластан кыра уонна орто биисинэһинэн дьарыктанар дьон кытынна. Төгүрүк остуол тула баар кыһалҕалары ырыттылар, инники былааннары торумнаатылар.


Хаҥаласка дьоҕус биисинэскэ аналлаах форумҥа ыраахтан-чугастан элбэх урбаанньыт кытынна. Форум арыллыытыгар Г.Ю. Алексеев эҕэрдэ тыл эттэ. Салгыы предпринимательства, атыы-эргиэн уонна туризм министиэристибэтин миниистирэ И.С. Высоких, Ил Түмэн депутата М.Н. Христофорова бэйэлэрин эҕэрдэлэрин уонна баҕа санааларын тиэртилэр.

Быыстапкаҕа бэйэлэрин бородууксуйаларын «Хаҥалас-Ас» ТХПК, «Бөртө», Нөмүгүтээҕи, Мохсоҕоллоохтооҕу килиэби оҥорор собуоттар астарын быыстапкаҕа туруордулар уонна атыылаатылар. Сиинэттэн сылдьар эдэр дьон бэйэлэрин сирдэригэр үүммүт хортуоппуйу патеннаан атыыга таһаардылар. Ити бааһынай фермерскэй хаһаайыстыбаны В.М. Заболоцкай салайар. Ону таһынан биирдиилээн сахалыы таҥас, илиинэн оҥоһуктар, саха быһаҕын, муус көйөр анньыыны оҥорон көрдөрүүгэ туруорбуттара биһирэннэ.

«Оҥорон таһаарар дьоҕус тэрилтэ кыһалҕата, ону быһаарар үлэ хайысхата» диэн ааттаах төгүрүк остуол култуура киинин иккис этээһигэр ыытылынна. Манна Нам, Горнай, Мэҥэ Хаҥалас уонна Чурапчы улууһуттан ыалдьыттар бааллар. Төгүрүк остуолу тыа хаһаайыстыбатын миниистирин солбуйар В.В. Афанасьев салайда. СӨ региональнай лизинговай хампаанньатын салайар Т.А. Бравина мустубут дьоҥҥо баантан кирэдьиит оннугар тэриллэрин лизинг нөҥүө ылаллара барыстааҕын быһаарда.

— Биһиги тыа хаһаайыстыбатын тиэхиньикэтин биэрбэппит. Ити өттүнэн кэпсэтии бара турар. Инникитин тиэхиньикэҕэ да ылсыахпыт. Биһигиттэн тэриллэри ылар баантан кредит ылардааҕар барыстаах, Арассыыйа тэрилэ буоллаҕына 6%, омук киэнэ 8% ставкалаах буолар, — диэтэ кини.
Мустубут дьон интэриэстэрэ лизинг-хампаанньаҕа улахан буолла. Ыйытыктарга Т.А.Бравина барытыгар хоруйдаата.  А.И. Чикачев «Фонд развития предпринимательства РС(Я)» кыра кирэдьиити биэрэр хампаанньаттан кэлэн үлэтин билиһиннэрдэ. Итини таһынан өссө улахан интэриэһи Саха сиринээҕи сертификация уорганын үлэтэ ылла. О.Ю. Пахомова үлэтин туһунан маннык кэпсээтэ:
Биллэрин курдук, билигин сертификацията суох бородууксуйаны ханна да батарбаккын. Ирдэбил уларыйа турар, ол үрдүнэн Арассыыйаҕа атыыланар бородууксуйа 50% атыны кубулутан (фальсификация) атыылыыллар. Атыыга тахсар биһиги балык аспыт, арыыбыт сонун арыйыы буолар. Онон ханнык баҕарар табаар росстандартка эппиэттэһэрин судаарыстыбаннай лабораторияҕа бэрэбиэркэлээн маркировка туруораллар, оччоҕо сертификат ылаллар. Ол кэнниттэн эппиэтинэһи судаарыстыба сүгэр.  

В.В. Афанасьев:
Чугас сытар хас да оройуон холбоһон үлэлииллэрэ ирдэнэр курдук. Биһиги бүгүн ол иһин чугас сытар улуустары холбуу ыҥыран үлэлиибит. Нам, Мэҥэ Хаҥалас, Хаҥалас улуустара биир сүбэҕэ киирэн үлэлэһиэхтэрэ диэн эрэнэбит. Төгүрүк остуол онно сөптөөх резолюция ылыныаҕа, — диэтэ.
«Самартай» ТХПК оҕуруот аһын сибиэһэйдии тоҥорон батарара ноу-хау буолар. Билигин ити тэрилтэ хотугу Дьааҥы улуустарын кытта үлэлэһэр. Ити ыраах сытар, оҕуруот аһа сибиэһэйдии кыайан тиийбэт сиригэр олус барыстаах да, туһалаах да буолар. Аны Дьокуускайга тыа сириттэн кэлэн олохсуйбут дьон элбэх буолан тыа хаһаайыстыбатын бородууксуйатын атыыга таһаарар ордук буолла. Ону таһынан Бүлүү бөлөх улуустарга, алмаастаах Мииринэйгэ батарар барыстаах буолуоҕа. Тыа сирин үлэһиттэрэ бородууксуйаны оҥорон таһаараллар, батарары сатаабаттар. Онон инникитин батарыы боппуруоһа турар, — диэтэ.
Көрсүһүү түмүгэр Хаҥалас улууһун баһылыга Г.Ю. Алексеев уонна СӨ региональнай лизинговай хампаанньатын салайааччыта Т.А. Бравина Сөбүлэҥ түһэристилэр.

 Ааптар: Мария Константинова

Добавить комментарий

Ваш e-mail не будет опубликован. Обязательные поля помечены *