«Өлөөн-торг» нэһилиэнньэни олохтоох бородууксуйанан хааччыйар

«Өлөөн-торг» нэһилиэнньэни олохтоох бородууксуйанан хааччыйар

Өлөөннөр төһө да ыраах чиэски сиргэ олордоллор, бэркэ дьаһанан үлэлииллэр-хамсыыллар, олоҕу кытта тэҥҥэ хаамаллар. Ол биир туоһутунан тыйыс айылҕалаах хоту дойдуга бэйэ бородууксуйатын ирдэбилгэ эппиэттиир гына оҥорон, нэһилиэнньэни хааччыйаллара буолар. «Сардаҥа» хаһыат кэрэспэдьиэнэ «Өлөөн-торг» тэрилтэ салайааччытын Никан Николаевы кытта кэпсэттэ. 


«Өлөөн-торг» муниципальнай эргиэн тэрилтэтэ 2018 сыллааҕы оройуон муниципальнай дьаһалтатын тиэрдиллибит муниципальнай сакаастары толорууга хайдах-туох үлэлэспитин туһунан салайааччы Никан Николаев маннык кэпсээтэ.

– Никан Николаевич, 2018 сыллааҕы үлэҕит сүрүн түмүктэрин билиһиннэриэҥ дуо?
– 2018 сыллааҕы муниципальнай сакаас сүрүннээн толорууга хааччылынна Дьэлиҥдэ, Харыйалаах, Өлөөн сэлиэнньэтин олохтоохторун сылы быһа олохтоох бородууксуйанан толору кэминэн хааччыллыыта быһаарылынна. Ону тэҥэ муниципальнай оҕо тэрилтэлэрин, доруобуйа харыстабылын, реабилитационнай киин уонна да атын тэрилтэлэри олохтоох бородууксуйанан хааччыллыыта ситиһилиннэ.


– Тэрилтэ саҥа ханнык эбии дьаһаллары олохтоото? Олохтоох бородууксайаны оҥорон таһаарар уонна булдунан дьарыктанар тэрилтэлэри кытта төһө дуогабар түһэрсэн үлэлээтигит?
– Нэһилиэнньэни олохтоох бородууксуйанан хааччыйарга анаан тыа хаһаайыстыбатын бородууксуйатынан оҥорор 13 аҕа ууһун общиналарын кытта дуогабар түһэрсилиннэ. 2018 сылга Өлөөн сэлиэнньэтигэр эти, балыгы таҥастыыр сыах үлэҕэ киирэн үлэтин саҕалаата уонна үс 40-нуу туонналаах рефережатордары атыылаһан, үлэҕэ туруордубут.

– Саха Өрөспүүбүлүкэтин атын оройуоннарыттан нэһилиэнньэ наадыйар аһын-үөлүн аҕалан атыылаан саҕалаатыгыт. Бу үлэ салҕанан барыа дуо?
– Хаппыыстаны, хортуоппуйу уонна балыгы атын оройуонтан соҕотуопканан аҕалан атыылыыры салҕыы ыытар былааннаахпыт. Ону тэҥэ олохтоох нэһилиэнньэттэн сир аһын — морошканы, сугуну уонна отону соҕотуопкалааһыны саҕалаатыбыт.

– «Өлөөн-торг»  дьиикэй кыыл табаны бултааһынынан дьарыктанар. Тэрилтэ бэйэтин булчуттарын биригээдэтинэн төһө төбө дьиикэй кыыл табаны уонна балыгы бултаата? Ону кылгастык билиһиннэриэҥ дуо?

– 2018 сылга тэрилтэ бэйэтин булчуттарын биригээдэтэ 200 төбө дьиикэй кыыл табаны бултаата, тугунок балык бултааһына үс туонна, собону бултааһын үс центнер буолла. 2019 сылга уопсай тыа хаһаайыстыбатын бородууксуйатын соҕотуопкалааһын таһымын үрдэтэргэ былаан баар.

– Нэһилиэнньэ үлэлээх уонна дьарыктаах буолуутун хааччыйыыга анаан нэһилиэнньэҕэ сибиинньэ, бэлэм теплица комплектарын уонна уоҕурдууну, ноһуому аҕалары хааччыйыыга үлэлэстигит. Ааһан эрэр сыл түмүгүнэн төһө үлэни оҥордугут? Салҕыыр былаан баар дуо?

– 2018 сылга 60 төбө сибиинньэ аҕалан Дьэлиҥдэ, Өлөөн, Харыйалаах сэлиэнньэлэрин олохтоохторугар бэрилиннэ. Теплица комплега – 20-чэ устуука, уоҕурдуу – түөрт туонна, ноһуом – биир массыына, комбикорм арааһа – 49,0 туонна. Бу хайысханы салҕыыр былаан баар.

– Инники өттүгэр тэрилтэ материальнай-техническай баазатын салгыы бөҕөргөтүүгэ туох-ханнык былааннар баалларый?  

– Оройуон дьаһалтатын үбүлээһинин быһаардаҕына Өлөөн сэлиэнньэтигэр 2019 сылга эти, балыгы уонна сир аһын таҥастыыр сыах тутуутун былаанныыбыт.
Бу күннэргэ ГаскомАрктика судаарыстыбаннай комитет  үбүлээһининэн Санкт-Петербург куораттан 40 туонналаах биир рефережаторы атыылаһан тимир суолунан Нерюнгри куоракка ыыттыбыт уонна кыһыҥҥы кыстык массыына суолунан Өлөөҥҥө аҕалар былааннаахпыт.
Билиҥҥи туругунан «Өлөөн-торг» эргиэн тэрилтэтэ тыа хаһаайыстыбатын бородууксуйатын оҥорооччулартан эти, балыгы, сир аһын арааһын уонна суббородууктаны соҕотуопкалааһыны салҕаан ыытар.

Саҥа дьылы көрсө Дьэлиҥдэ сэлиэнньэтигэр эт бородууксуйаны кыһыҥҥы массыына суолунан тиэрдиитэ хааччыллыа, «Биириктэ» учаастагыттан бултаммыт балыгы таһааран нэһилиэнньэҕэ атыыга таһаарар былааннаахпыт. Ону таһынан аҕа ууһун общиналарыттан эти, балыгы, сир аһын уонна суббородууктаны эбии соҕотуопкалаан Саҥа Дьыллааҕы атыы-эргиэн дьаарбаҥкатыгар таһаарар санаалаахпыт.

Ааптар: Николай Стручков

Добавить комментарий

Ваш e-mail не будет опубликован. Обязательные поля помечены *