Таатта Баайаҕатыгар аныгы буойуна тутулунна

Таатта Баайаҕатыгар аныгы буойуна тутулунна

Соторутааҕыта Баайаҕа нэһилиэгэр Семен Николаевич Андросов салайааччылаах «Баай-Ас» СХПК аныгы технологияларынан сэбилэммит сүөһү өлөрөр буойуната аһылынна. Сүөһүнү убойнай сыахха киллэрииттэн саҕалаан эт тоҥоруллар, хараллар анал сиригэр диэри барыта сыа-сым курдук тутуллан бэртээхэй астыыр усулуобуйата тэриллибит. 


Таатта Баайаҕатыгар бэртээхэй сүөһү өлөрөр буойуна арылынна. Бу улахан тутууну «ИП Николай Николаевич Андросов» тутар биригээдэтэ муус устарга диэри тутар матырыйаалын таһан бүтэн, сайыҥҥыттан саҕалаан балаҕан ыйыгар диэри оҥорон бүтэрбит. Онтон алтынньы-сэтинньи ыйдарга ситэрэн, тутууну бүтэрэн «Баай-Ас» СХПК-ҕа туттарда.

«Баай-Ас» СХПК толорооччу дириэктэрэ Зиновий Варламов иһитиннэрбитинэн буойунаны тутууга уопсайа 20 мөл.солк. үп көрүүллүбүтүттэн 12 мөл.солк. тыа хаһаайыстыбатын министиэристибэтэ, 1 мөл.солк улуус дьаһалтата, онтон ордугун хаһаайыстыба бэйэтэ уйуммут. Биир сменаҕа уон төбө сүөһүнү холкутук өлөрүөн сөп. Муҥутуур кыаҕын туһаннахтарына 16 төбөҕө тиэрдэр кыахтаахтар. Инникитин күһүҥҥү идэһэ кэмигэр биирдиилээн дьон да, атын хаһаайыстыбалар да анал сайаапканан бэйэлэрин сүөһүлэрин аҕалан астатыахтарын сөп.

Тэрээһиҥҥэ мустубут дьону эстрада талааннаах ырыаһыта Майя Сергина, нэһилиэк уус-уран самодеятельноһын кыттыылаахтара, талба талааннаахтара эҕэрдэлээтилэр. Аал уоту Баайаҕаҕа уһуннук Сэбиэт бэрэссэдээтэлинэн үлэлээбит Семен  Иванов алҕаата.

Үөрүүлээх түгэҥҥэ тыа хаһаайыстыбатын министиэристибэтин сылгы, сүөһү иитиитигэр Департамент салайааччытын солбуйааччыта Алексев Дмитриевич Жирков, «Таатта улууһа» МО баһылыга Михаил Михайлович Соров, Баайаҕа нэһилиэгин баһылыга Роман Романович Романов, тыа хаһаайыстыбатын бородууксуйатын переработкалыыр кооператив бэрэссэдээтэлэ Семен Дмитриевич Андросов, урбаанньыт, тутааччы Николай Николаевич Андросов, улуус нэһилиэктэриттэн, араас тэрилтэлэриттэн анаан-минээн эҕэрдэлээтилэр, саҥа бойня инникитин улууска бастыҥ бородууксуйалаах буоларыгар үтүө баҕа санааларын тиэрдэн эҕэрдэлэрин, тутааччыларга, үлэһиттэргэ наҕараадаларын, сэмэй бэлэхтэрин туттардылар.

Ааптар: Виктор ВИНОКУРОВ

Добавить комментарий

Ваш e-mail не будет опубликован. Обязательные поля помечены *