Түөрт хаайыылаах айаҕын тиктибит диэн кырдьык дуо?

Дьокуускай куорат 1 №-дээх кытаанах эрэсиимнээх холуонньатыгар сэттэ хаайыылаах буруйдарын боруостуур усулуобуйаларын утаран, бырачыастыыр акция биллэрбиттэр.

edersaas.ru

Бу туһунан бастакы иһитиннэрии «Медиазона» соҕурууҥҥу интэриниэт-сайтка ахсынньы 6 күнүгэр бэчээттэммитэ. Онтон бу сайтка иһитиннэрии СӨ Уопсастыбаннай кэтиир хамыыһыйатын (ОНК) бэрэссэдээтэлэ Марина Семеноваттан киирбит.

Марина Семенова бэлиэтээбитинэн, холуонньа ыстарааптыыр изоляторыгар (ШИЗО) олорор сэттэ хаайыылаах өссө ахсынньы 4 күнүгэр аччыктааһын биллэрэн, айахтарын тиктибиттэр. Хамыыһыйа тиийиитигэр, ити сэттэ киһиттэн түөрдэ сол курдук айахтарын тиктэн олороллор эбит.

Бырачыастаабыт төрүөттэрэ диэн — кыһыҥҥы таҥаспыт суох, камераларга олус тымныы, итии уу суох уонна тэллэх тиийбэт буолан, тымныы муостаҕа сытабыт диэн. Маны таһынан, холуонньа үлэһиттэрэ кырбыыллар, омугунан көрөн атаҕастыыллар диэн үҥсүбүттэр. Өскөтүн балаһыанньа уларыйбатаҕына, тымырбытын быстыахпыт диэн суоһурҕаммыттар.

Хамыыһыйа ыстарааптыыр изоляторга олорор хаайыылаахтар усулуобуйалара чахчы ыарахан диэн бигэргэппит. Бэрэбиэркэтин түмүгүн РФ Накаастабылы толорор федеральнай сулууспатын Саха сиринээҕи управлениетын начальнигар, өрөспүүбүлүкэ борокуратууратыгар тиэрдибит.

РФ Накаастабылы толорор федеральнай сулууспатын Саха сиринээҕи управлениетын пресс-сулууспата:

— 2018 сыл ахсынньы 5 күнүгэр Дьокуускай куорат 1 №-дээх холуонньатын ыстарааптыыр изоляторыгар киллэриллибит түөрт хаайыылаах холуонньа дьаһалтатын сокуоннай дьайыыларын утаран, бэйэлэрин эчэттилэр. Ол эчэйиилэрэ доруобуйаларыгар да, олохторугар да куттала суохтар. Бүгүҥҥү күҥҥэ үс хаайыылаах сокуоннайа суох модьуйууларыттан аккаастанна.
Ахсынньы 6 күнүгэр ыстарааптыыр изоляторга олорор 9 хаайыылаах аһыыртан аккаастанар туһунан сайабылыанньа биэрбиттэр.
РФ Накаастабылы толорор федеральнай сулууспатын Саха сиринээҕи управлениетын ыҥырыытынан, бу холуонньаҕа борокуратуура бэрэстэбиитэллэрэ, СӨ Киһи быраабыгар боломуочунайа Сардаана Гурьева уонна СӨ Уопсастыбаннай кэтиир хамыыһыйатын чилиэннэрэ сырыттылар.
Күн аайы холуонньа медицинскэй үлэһиттэрэ температураны мээрэйдээн, түмүгүн учуот сурунаалыгар суруйан иһэллэр. Онно суруллубут туоһулуурунан, холуонньа камераларыгар 18-22 кыраадыска тэҥнэһэр, ол эбэтэр, нуормаҕа сөп түбэһэр. Бары хаайыылаахтар таҥаһынан толору хааччыллыбыттар. Оттон ыстарааптыыр изоляторга олорор хаайыылаахтары сотрудниктар кырбыыллар диэн иһитиннэрии оруна суох.
Бу 1 №-дээх холуонньаҕа үөскээбит быһыы-майгы матырыйааллара силиэстийэ уорганнарыгар бэриллибиттэр. Процессуальнай уураах таһаарарга.

Вера Макарова, «Саха сирэ» хаһыат, edersaas.ru

Хаартыска: интэриниэттэн.

0
0

Добавить комментарий

Ваш e-mail не будет опубликован. Обязательные поля помечены *