Муома баһылыга өрөспүүбүлүкэ салайааччыларын кытта кэскиллээх кэпсэтиилэри ыытта

Муома баһылыга өрөспүүбүлүкэ салайааччыларын кытта кэскиллээх кэпсэтиилэри ыытта

Соторутааҕыта Муома оройуонун Аҕа баһылыга Иван Павлов куоракка өрөспүүбүлүкэ үөһээ салалтатын кытта көрүстэ. Тустаах салааларынан оройуон инники үлэтин торумнуур кэпсэтиилэри ыытан кэллэ. 


Муома баһылыга бастатан туран, билигин Муома интэриэһин көмүскүүр СӨ Судаарыстыбаннай мунньаҕын норуот дьокутааттара В.А. Местников уонна Л.Л. Явловская бииргэ үлэлэспиттэрин бэлиэтиир. Василий Александрович СӨ Бырабыыталыстыбатын бэрэссэдээтэлин бастакы солбуйааччы А.З. Колодезниковы кытта көрсүһүүгэ бииргэ сырытта. Көрсүһүүгэ улууска электростанция тутуутун боппуруоһун сүрүннээн туруордулар. Ону таһынан авиация, промышленность, суол-иис, тутуу, коммунальнай уонна тыа хаһаайыстыбалар боппуруостарын дьүүллэстилэр. Бэрт сотору Ил Тумэҥҥэ инвестиционнай бырагыраамаҕа оройуон тутууларын киллэрэргэ күүстээх киирсиилэр буолуохтара.

Любовь Леонидовна кэпсэтэн СӨ доруобуйа харыстабылын саҥа миниистирин Е. А. Борисованы кытта көрүстүлэр. Кини саҥа балыыһа бырайыагын көрөн улаханыттан сөхтө, бэйэтэ улахан объектары тутууга үлэлээбит, боппуруоһу иһиттэн үчүгэйдик билэн олорор эбит. Модульнай типтээх объектары тутуохха сөп диэн санаалаах. Хоту сиргэ биир ФАП-ы тутарга сыаната ортотунан 40 мөл.солк. тэҥнэһэр диир. Кэпсэтии түмүгэр Елена Афраимовна кэлэр сыл бастакы кварталыгар кэлэ сылдьыах буолан эрэннэрдэ, биир эрэ күн буолбатах диир. Каадыр боппуруоһугар баар дьоҥҥутун тутан олороргут наадалаах диэтэ, сорохторго балаһыанньа өссө мөлтөһүөр эбит.

СӨ үпкэ миниистирин В.А. Жондоровы кытта сирэй көрсөн, оройуон бюджетын, үп-харчы, кредиторскай иэс тула  кэпсэттибит. Алтынньы саҥатыгар оройуон 73 мөл.солк. иэстээх этэ, син үлэлэһэн иэспит 61 тыһ.солк. диэри кыччаата. Ол эрээри бу сууманы сыл бүтүөр диэри хайдах төлөһөбүт диэн боппуруос күөрэйэр. Оройуон үпкэ отделын сэбиэдиссэйэ П.С. Гермогенов барытыгар бииргэ сылдьыста, тустаах отделлары кытта үлэлэстэ. Кэлэр сылтан коммунальнай хаһаайыстыба өҥөтүгэр саҥалыы аҕар методика киириэхтээх.  Кырдьыга, ити 61 мөл.солк. иэстэн улахана, эбэтэр 50 мөл.солк. коммунальнай  эрэ өҥөҕө. Онон бу хайысхаҕа үлэни күүскэ туһаайар сорук турар. Ону таһынан миниистир оптимизация боппуруоһун, бюджет харчытын кэмчилииргэ туох үлэ барбытын интэриэһиргиир.

СӨ транспорын миниистирин А.Е. Тарасовы кытта массыына суолун, көтөр аал сырыытын туһунан кэпсэттилэр. Көтөр аалынан куруустаах уонна пассажирскай рейстэри элбэтэри туруорустулар. Билигин “Полярные авиалинии” хампаанньаҕа биэс эрэ устуука  Ан-24 самолет көтөр. Үксүлэрэ өрөмүөҥҥэ тураллар, алдьаналлар, эргэрэн туһаттан тахсаллар. Ол иһин рейстэри холбууллар.

— Өссө бырайыас сыаната үрдүөхтээх диэн буолла. Суол туругун кэпсэтиигэ, сылын аайы нэһилиэктэр бюджеттарыгар туһаныллыбакка хаалар үптэрэ нөҥүө сылга көһөрүллэн биэрэр. Ону суол оҥоһуутугар ыытары анал суол Фондатын үлэтин Балаһыанньатыгар ыйыахха наадатын ыйдыбыт. Манна үп министиэристибэтэ кытта сөбүлэҥин биэрдэ. Бу бөһүөлэктэр суоллара тупсарыгар тирэх буолуо, — диир баһылык.

СӨ тутуу уонна архитектура миниистирин П.А. Аргунову кытта көрсүһүүгэ саҥа тутуллар объектар хаачыстыбаларын, тарыыптарын, сыаналарын  тула кэпсэттилэр.Иккис этап Сөбүлэһиитэ аны кэлэр сыл муус устар ыйга эрэ баттаһар эбит.

— Биллэр төрүөттэринэн куоҥкурустар, дуогабардар кэмин куоттаран,  тутуу матырыйаала ситэ кэмигэр кэлбэтинэн үүнэр сылга ханнык да тутуу барбат буолла. Онон кэлэр сылга эрдэттэн үлэлэһэн 2020 сылга тутуу барарын ситиһиэхпитин наада.  Ол да буоллар искусство оскуолатын тутуутун ситэрэргэ туруорсабыт, элбэх үп-харчы кутуллубута, туттарарга дьулуһуохха, — диэн бэлиэтиир Павлов.

СӨ  “Арктика”  Госкомитетын саҥа салайааччытын П.Р. Николаевы кытта көрүстүлэр. Кэпсэтии түмүгэр 250 табаны, вездеход көлөнү уонна ыстаадалар маршруттарыгар туттуллар дьоҕус дьиэлэри ылыах буоллулар. Ону сэргэ Комитет  таба иитиитин боппуруоһун дьүүллэһэр мунньахха ыҥырда. Киэҥ ыҥырыылаах мунньахха СӨ Бырабыыталыстыбатын бэрэссэдээтэлин солбуйааччы Д.Г. Белозеров, хоту улуустар баһылыктара, дьокутааттар кыттыыны ыллылар.

— Таба иитиитигэр кыһалҕа барыбытыгар биир. Салааҕа үтүмэн үп көрүллэр, улахан өйөбүл баарын үрдүнэн, төттөрүтүн таба ахсаана таҥнары түһэр, өнүйбэт диэн бэлиэтээн эттилэр. Ол эрээри табалары  элбэтэр, табаһыттары өйүүр боппуруос бэбиэскэттэн түспэт, — диэн санаатын этэр Муома баһылыга.

Маны таһынан Иван Петрович биологическай ресурсалар Департаменнарын, СӨ тыатын хаһаайыстыбатын, СӨ баай-дуол уонна сир сыһыаннаһыыларын министиэристибэлэрин, СӨ ОДьКХ ГУТ, кэлэр көлүөнэ Фондатын, мелиорация Управлениетын,  уонна “Туймаада” ФАПХ салаталарын, ону сэргэ “Биир ньыгыл” баартыйа салалтатын кытта көрүстэ.  Бу күннэргэ муомалар улууска тыа хаһаайыстыбатын күннэрин чэрчитинэн миниистир А.П. Атласовы  күүтэллэр. Кыһыҥҥы ыйдарга В.В. Омуков кэлиэхтээх.

Ааптар: «Индигир уоттара» хаһыат

Добавить комментарий

Ваш e-mail не будет опубликован. Обязательные поля помечены *