Сунтаарга олоҥхону мобильнай сыһыарыыга ааҕаллар

Сунтаарга олоҥхону мобильнай сыһыарыыга ааҕаллар

Бу чэппиэргэ Сунтаар улууһун дьаһалтатын мунньахтыыр саалатыгар олоҥхону чинчийээччи, бэрэпиэссэр, филологическай наука дуоктара Василий Илларионов кытта көрсүһүү буолла. Манна «Сунтаар – Олоҥхо дойдута» көмүс сиэрийэҕэ киирбит Павлов И.Д.-Түүлээх Уйбаан «Аар Сааргы аатырбыт ат курдук ааттаах Ааттаах Адаам Саар» олоҥхотун кинигэтэ уонна «Сунтаар – Олоҥхо дойдута» мобильнай сыһыарыы бар дьон болҕомтотугар сүрэхтэннилэр.


Туойдаах нэһилиэгиттэн төрүттээх олоҥхоһут Иван Павлов-Түүлээх Уйбаан «Аар Сааргы аатырбыт ат курдук ааттаах Ааттаах Адаам Саар» олоҥхотун биир дойдулаахпыт Василий Илларионов сурукка тиһэн кинигэ гынан таһаарбыт.

Сунтаар улууһун баһылыгын экономическай сайдыыга уонна стратегическай былааннааһыҥҥа солбуйааччы Борис Васильев, Туойдаах нэһилиэгин баһылыга Владимир Анисимов, улуустааҕы култуура уонна духуобунай сайдыы, үөрэх управлениелара, Сунтаардааҕы киин бибилиотечнай ситим, Павлов И.Д.-Түүлээх Уйбаан аймахтара бу бэлиэ түгэнинэн Василий Васильевичка эҕэрдэ, махтал тылларын эттилэр. Иван Данилович аймахтара кини туһунан истиҥ иһирэх тыллары кэпсээтилэр.

«Сунтаар – Олоҥхо дойдута» көмүс сиэрийэ 2017 сыллаахтан улуус баһылыга Анатолий Григорьев, оройуон дьокутааттарын Сэбиэтин бэрэссэдээтэлэ Ульяна Попова, улуустааҕы култуура уонна духуобунай сайдыы управлениетын начаалынньыга Мария Кобельянова бырайыактарынан иккис сылын таҕыста. «Аар Сааргы аатырбыт ат курдук ааттаах Аатаах Адаам Саар» олоҥхо кинигэтэ бу сиэрийэҕэ киирдэ. Бу кинигэҕэ олоҥхо, ааптардар комментарийдара, бэлиэтээһиннэрэ, олоҥхо сюжетын ырытыы, анал ааттар ыйынньыктара, быһаарыылара уонна Түүлээх Уйбаан туһунан ахтыылар киирэ сылдьаллар.
Маны сэргэ, көрсүһүүгэ 2016 сыллаахха биллэриллибит Гражданскай көҕүлээһин сылын чэрчитинэн ыытыллыбыт Сунтаар улууһун баһылыгын Гранын кыайбыт «Сунтаар – Олоҥхо дойдута» мобильнай сыһыарыытын бырайыак ааптара Евдокия Сивцева билиһиннэрдэ. Манна Сунтаар улууһун олоҥхоһуттарын туһунан информациялар, кинилэр олоҥхолоро киирэ сылдьаллар. Билиҥҥи туругунан сыһыарыыга биэс олоҥхо, 180-тан тахса олоҥхоһут туһунан ахтыы киирэ сылдьар. Инникитин мобильнай сыһыарыы кэҥээн, сайдан иһиэҕэ. Android ОС нөҥүө үлэлиир, Google Play маркетыттан босхо ылыахха сөп.

Ааптар: Станислав Ноговицын 

Добавить комментарий

Ваш e-mail не будет опубликован. Обязательные поля помечены *