Бүгүн Дьокуускайга Ыччат баала буолла (ХААРТЫСКАЛАР)
Бүгүн Дьокуускайга «Сэргэлээх уоттара» култуура киинигэр Волонтер сылын түмүктүүр уонна РФ-ҕа Тыйаатыр сыла биллэриллибитинэн эстафетаны туттарар Ыччат баала буолла. Манна ыччат бэлиитикэтигэр бастыҥ үлэлээх дьону, улууһу, түмсүүнү быһаардылар, сыл түмүгүн таһаардылар.
Баалга Ил Дархан Айсен Николаев ыалдьыттаата:
—— Биһиги ыччаппыт Саха сирин сайыннарар кыахтаах дии саныыбын. Эһиги үҥкүүлүүрү, ыллыыры эрэ сатыыр буолбатаххыт, эһиги бу ааһан эрэ Волонтер сылын көхтөөхтүк атаардыгыт. Өрөспүүбүлүкэ хас алтыс олохтооҕо ыытыллыбыт аахсыйаҕа кыттыста, 125 тыһ. киһиэхэ көмө оҥоһулунна. Үгүс дьоҥҥо маннык хабааннаах аахсыйаларга кыттыы ис сүрэхтэн тахсар үлэ буолла. Өрөспүүбүлүкэбитигэр ыытыллар тэрээһиннэр волонтердара суох буолбаттар. Бу хамсааһын күннээҕи олохпутугар оҥорор дьыалабытыгар тэҥнэстэ. Кэлэн иһэр Саҥа дьылынан барыгытын эҕэрдэлиибин! Биир санаа, биир күүс буолан Сахабыт сирин сарсыҥҥытын түстүөҕүҥ.
Баалга үгэскэ кубулуйбут номинациялары туттардылар — «Сыл лидерэ», «Сыл доброволеһа», «Сыл наставнига», «Бастыҥ уопсастыбаннай тэриллии» уонна «Ыччаты кытта үлэлиир бастыҥ структура». Маны таһынан, биирдиилээн бастыҥнары Ил Дархан уонна «Ромолодежь» махтал суруктарынан наҕараадалаатыгар.
Кэлэр 2019 сыл Арассыыйаҕа Тыйаатыр сылынан биллэриллибитэ. Онон Волонтер сылыттан Тыйаатыр сылыгар эстафетаны тиэрдии сиэрэ-туома буолла.
Салгыы СӨ ыччат дьыалаларын уонна социальнай коммуникациятын миниистирэ Степан Саргыдаев: «Манна өрөспүүбүлүкэ саамай көхтөөх уонна бастыҥ ыччата муһунна. Бу сыл устата үгүскүт араас таһымнаах куонкурустарга, форумнарга, тэрээһиннэргэ кытынныгыт. Волонтер хамсааһына Саахабыт сиригэр улаатта, өссө да дьону түмэ туруоҕа дии саныыбын. Эһиги өрөспүүбүлүһкэбит сайдарыгар төһүү күүс буолаҕыт. Кэлэн иһэр Саҥа дьылынан эҕэрдэлиибин! Ааһан эрэр Волонтер сылыгар, үүнэн эрэр тыйаатыр сылыгар, норуоту бүттүүн түмэр Сомоҕолоһуу сылыгар — Уруй!» — диэн баҕа санаатын ыччакка анаата.
Инньэ диэн туран, Степан Анатольевич үгүс сылларга ыччат бэлиитикэтигэр бэриниилээхтик үлэлээбит, үгүс сыраны уурбут дьону — Мэҥэ Хаҥалас улууһун ыччат управлениетын сүрүн исписэлииһин Зоя Сергучеваны, «Биир Ньыгыл Арассыыйа Эдэр Гвардиятын» Саха сиринээҕи аппаратын салайааччытын Раиса Контоеваны, СӨ улуустарын ыччатын түмсүүтүн бэрэссэдээтэлин солуйааччытын Аида Сячикованы «Ыччат бэлиитикэтин туйгуна» анал бэлиэнэн наҕараадалаата.
Айтана Аммосова, edersaas.ru
Мария Васильева хаартыскаҕа түһэриилэрэ.
