Ил Түмэн дьокутаата Иван Андреев Эбээн Бытантай оҕолоругар Моруос оҕонньор буолан тиийдэ

Эбээн Бытантайга саргылаах Саҥа дьылы көрсө оҕо-аймахха тэрээһиннэр ахсынньы ый устата ыытыллаллар. Харыйа тула бырааһынньыкка доруобуйатыгар хааччахтаах оҕолор ордук үөрэллэр. Кинилэргэ бу тэрээһин улахан суолталаах, кэтэһиилээх, мааны буоллаҕа. 

---

Бу күннэргэ  доруобуйаларыгар хааччахтаах уонна тулаайах  оҕолорго анаан  Эбээн Бытантай улууһун социальнай харалтатын салалтата Харыйа бырааһынньыгын ыытта. Үтүө үгэһинэн Ил Түмэн дьокутаата, «Арктик Капитал» ООО генеральнай дириэктэрин сүбэһитэ Иван Андреев сылын аайы бу оҕолорго анаан бэлэхтэрин ыытар. Улуус тэрилтэлэрэ эмиэ туора турбакка бэлэхтэрин  анаан оҕолор үөрүүлэрэ-көтүүлэрэ өссө үксээтэ.

Маны таһынан олохтоох дьаһалта хас биирдии кэлбит оҕону минньигэс астарынан күндүлээтэ. Оҕолор оонньоон-көрүлээн дуоһуйа сынньаннылар, ырыаны-үҥкүүнү оройуттан туттулар. Хас биирдии киһиэхэ кыра да болҕомто, истиҥ сыһыан туохтааҕар да күндү буолар. Иван Ивановичка төрөппүттэр уонна оҕолор махталлара баһаам.

Ааптар: «Бытантай уоттара»