Табалаахха үскүүстүбэ үлэһиттэрэ төрөөбүт күннээтилэр

Табалаахха Баатаҕайдааҕы үскүүстүбэ оскуолатын филиала тэриллибитэ 15 сылыгар аналлаах үбүлүөйдээх тэрээһин буолан ааста. Окуола иитиллээччилэрэ, төрөппүттэр уонна үлэлээн ааспыт дьон истиҥ эҕэрдэлэринэн кынаттаммыт киэҥ бырагараамалаах түһүлгэ бастакы түһүмэҕэ спорт саалаҕа ыытылынна.

---

Баатаҕайдааҕы үскүүстүбэ оскуолатын филиалын төрөөбүт күнүн долгуйа күүппүт дьон саҥа көстүүмнэрдээх ураты үҥкүүлэри, ырыаһыттар толорууларын кэрэхсии сэргээтилэр. Муусука оскуолатын урукку иитиллээччитэ Татьяна Баишева, эдэр исписэлиис Анна Третьякова, муусука салайааччыта Гаврил Титов уонна оскуола салайааччыта Татьяна Анатольевна Баишева сыралаах үлэлэрин түмүгэ көһүннэ. Кыһыҥҥы кырыалаах хаар долгураҥын санатар үҥкүү, сүүрбэччэ уол ырыата, саха үҥкүүтэ уо.д.а. ыйы быһа бэлэмнэммит нүөмэрдэр көрөөччү уҕараабат ытыһын тыаһынан доҕуһуолланнылар.

СӨ Култууратын, Үөрэҕириитин туйгуна Татьяна Анатольевна төрөөбүт дойдутугар анаабыт үлэтэ, олоҕо бу оскуола дьылҕатын кытта ыкса ситимнээх. Оскуола тутуллан, үөрэх бастакы күнүн аанын арыйалларыгар үлэ хайдах саҕаламмытай да, ол тэтимин ыһыктыбакка, 15 сылаах үбүлүөйүн бэлиэтээтилэр. Табалаах маанылаах Далбар Хотуна Татьяна Анатольевна киһи быһыытынан элэккэйэ, аһаҕас, ыраас майгылааҕа, кинини тулалыыр уһуйааччыларын, иитээччилэрин сыһыаннарыгар көстөр.

Элбэх оҕону олох киэҥ аартыгар үктэннэрбит ийэлии сылаас сыһыаннаах салайааччы оскуолатын ис-тас көстүүтэ элбэҕи этэр. Бу үөрүүлээх түһүлгэҕэ олохтоох дьаһалта, төрөппүттэр, тэрилтэлэр истиҥ тылынан эҕэрдэлээтилэр. “Оҕо үөрүүтэ уһуйааччы сүргэтин көтөҕөр. Оттон уһуйааччы үөрүүтэ – иитиллээччи үүнүүтэ, сайдыыта”, – диир талааннаах салайааччы Татьяна Анатольевна.

Ааптар: Раиса ЧИРИКОВА