Айсен Николаев “Сахатранснефтегаз” тэрилтэ отчуотун иһиттэ

“Сахатранснефтегаз” – өрөспүүбүлүкэ биир тутаах тэрилтэтэ. Билиҥҥи туругунан, хампаанньа сэттэ тыһыынчаттан тахса килэмиэтирдээх гаас ситимин көрөр. Генеральнай дириэктэр Иван Макаров бэҕэһээ Ил Дархан Айсен Николаевка былырыыҥҥы үлэлэрин түмүгүн отчуоттаата.

Иван Константинович бэлиэтииринэн, хампаанньа өрөспүүбүлүкэ үрдүнэн барыта 7,1 тыһыынча км усталаах гаас ситимин көрөр. Бу мантан 2,7 тыһ. км магистральнай турбанан ааһар ситим. 2018 сыл түмүгүнэн былааннарын 100 % толорбуттар. Быһа холуйан, 300 мөл. солк. барыһы киллэрбиттэр.
Быйыл хампаанньа нэһилиэнньэҕэ 1,6 млрд куб м гааһы биэрэр санаалаах. Бэлиэтээн эттэххэ, тыа сиригэр гаас ситимин тардыы салҕанан бара турар. Бу соторутааҕыта Саҥа дьыл иннинэ Мэҥэ Хаҥалас улууһун Бүтэйдээҕэр уонна Чурапчы Хайахсытыгар гаас киирбитэ. Генеральнай дириэктэр этэринэн, быйыл нэһилиэнньэлээх пууннарга гаас ситимин киллэриини салгыы ыытыахтара, ону таһынан хаһаайына суох гаас ситимнэрин бэйэлэригэр докумуоннатарга, аччыгый бизнестээх дьон гааска холбонууларын болдьоҕун кыччатарга үлэлэһиэхтээхтэр. Дьокуускай куорат ситимнэрин схематын оҥоруу эмиэ биир улахан болҕомтону ирдиир.
Айсен Николаев мунньах түмүгэр “Сахатранснефтегаз” өрөспүүбүлүкэҕэ биир улахан суолталаах тэрилтэ буоларын, ааспыт сылга туруоруммут сыалын ситиспитин, сылы үчүгэй көрдөрүүлээх түмүктээбитин бэлиэтээн туран, быйыл онтон итэҕэһэ суох сүдү үлэ күүтэрин эттэ. “Бастакы уочарат, өрөспүүбүлүкэҕэ гаас ситимнэрэ, эбийиэктэрэ бары куттала суох буолууларын хааччыйыы соруга турар. Манна өрөспүүбүлүкэ да, муниципальнай да таһымҥа өйөбүл наада. Ити хампаанньа салгыы сайдарыгар, туох баар былаанын толороругар төһүү күүс буолуоҕа”, — диэн этэр Айсен Сергеевич.

Аграфена КУЗЬМИНА, “Саха сирэ” хаһыат.

0
0

Добавить комментарий

Ваш e-mail не будет опубликован. Обязательные поля помечены *