Үөһээ Бүлүүгэ волейболга алтыс өрөспүүбүлүкэтээҕи турнир саҕаланна

Үөһээ Бүлүүгэ волейболга алтыс өрөспүүбүлүкэтээҕи турнир саҕаланна

Үөһээ Бүлүү оройуона спорду өрө туппут улууһунан биллэр-көстөр. Саҥа сылга үктэнээт, волейболга өрөспүүбүлүкэ таһымнаах күрэхтэһии саҕаланна. Бу көрүҥҥэ Саха АССР сүүмэрдэммит хамаандатын чилиэнэ, өр сылларга оройуон саахымакка федерациятын салайбыт Василий Степанович Кынатов сырдык кэриэһигэр ананар.


СӨ норуотун хаһаайыстыбатын үтүөлээх үлэһитэ, ССРС бэчээтин туйгуна, улуус историятыгар идэтийбит полиграфиһынан биллэр ытык-мааны киһи, тустуук, улууска волейбол сайдыытыгар сүҥкэн кылаатын киллэрсибит ытыктанар тренер, волейболга Саха АССР сүүмэрдэммит хамаандатын чилиэнэ, өр сылларга оройуон саахымакка федерациятын салайбыт Василий Степанович Кынатов сырдык кэриэһигэр волейболга алтыс өрөспүүбүлэкэтээҕи турнир Үөһээ Бүлүүгэ кииннээн саҕаланна. «Үс хоһуун» спортивнай комплекс киэҥ уораҕайыгар үөрүүлээх быһыыга-майгыга ыытыллар.

Хамаандалар параадтаан киирбиттэрин кэннэ эҕэрдэ тылы улуус волейболга федерациятын бэрэссэдээтэлэ Николай Николаев, улуус спортка уонна физическай культуураҕа управлениетын начаалынньыга Василий Петров, Василий Кынатов уола Д.С. Спиридонов аатынан 4-с нүөмэрдээх оскуола дириэктэрэ Юрий Кынатов, күрэхтэһии кылаабынай судьуйата Яков Сивцев уонна «Үөһээ Бүлүү» хаһыат эрээдэктэр-дириэктэрин солбуйааччы Галина Семенова эттилэр.

Үгүс көлүөнэ волейболистары үөрэтэн-такайан таһаарбыт уопсастыбаннай тренердэр Клавдия Саввиноваҕа уонна Евдокия Александроваҕа улууска волейбол сайдыытыгар киллэрсибит кылааттарын иһин махтал сурук уонна түөскэ иилиллэр анал бэлиэ туттарылынна.

Өрөспүүбүкэтээҕи турнирга барыта 12 хамаанда күөн көрсө сылдьар. Үөһээ Бүлүү бэйэтин хамаандатыттан ураты волейбол былдьаһыктаах мээчигин Мэҥэ Хаҥалас, Уус Алдан, Ньурба, Сунтаар уонна Бүлүү улуустарын спортсменнара өрүтэ күөрэтиэхтэрэ. Турнир икки күн устата ыытыллыаҕа.

Юрий Кынатов:

— Үгэскэ кубулуйбут волейболга өрөспүүбүлүкэтээҕи көһө сылдьар турнир бүгүн аан маҥнайгытын Үөһээ Бүлүүгэ ыытылла турарыттан уонна мин ытыктыыр аҕам Василий Степанович сырдык кэриэһигэр анаммытыттан биһиги дьиэ кэргэн бука бары сүрдээҕин долгуйабыт, үөрэбит. Турнирга аҕам аатын биэриэххэ диэн идиэйэни улуус волейболга федерациятын бэрэссэдээтэлэ, улуус дьокутааттарын Сэбиэтин бэрэссэдээтэлэ, аҕабар уһуйуллубут спортсмен, волейболист Николай Николаев көтөхпүтэ. Аҕам туһунан бэрт элбэҕи кэпсиэххэ сөп. Кини Саха АССР сүүмэрдэммит хамаандатыгар киирэн өрөспүүбүлүкэтин чиэһин Владивостокка, Улан-Удэҕэ тиийэ көмүскээбитэ. 1974 сыллаахха Үөһээ Бүлүү хамаандата өрөспүүбүлүкэ үрдүнэн үһүс миэстэни ылан турар, ол кэнниттэн миэстэлэһэ иликпит. Аны туран, сарсын Арассыыйа бэчээтин күнүн бэлиэтиэхпит. Аҕам Үөһээ Бүлүү типографиятын 1964 сылтан салайан үлэлэппитэ, 40-ча сыл тэрилтэ дириэктэринэн үрдүк таһаарыылаахтык үлэлээбитэ, улуус историятыгар суолун-ииһин хаалларбыт полиграфист. Онон кини аатынан турнир уонна кини идэлээх бырааһынньыга оруобуна сөп түбэһиспиттэрэ бэйэтэ ураты суолталаах. Итинник этэн туран, «Үс Хоһуун» баараҕай комплекс үөһээ бүлүүлэр барыбыт үөрүүбүтүгэр тутуллан, инникитин волейбол биһиги улууска күүскэ сайдарыгар улахан төһүү күүс буолуо диэн эрэллээхпин.

Ааптар: Галина Семенова

Добавить комментарий

Ваш e-mail не будет опубликован. Обязательные поля помечены *