Өймөкөөн улууһугар 2024 сылга дылы үөрэх эйгэтин концепцията бигэргэннэ

Өймөкөөн улууһугар 2024 сылга дылы үөрэх эйгэтин концепцията бигэргэннэ

Өймөкөөн улууһун үөрэхтээһин тэрилтэлэрин салайааччылара улуус киинигэр мустан, Сэбиэт тэриммиттэрэ. Төрүт орто оскуолатын дириэктэрэ Мария Николаева аныгы сайдыылаах киһини иитэн таһаарыы сүрүн хайысхаларыттан биирдэстэринэн, оҕо дьоҕурун, талаанын кэмигэр арыйыы буолар диэн бэлиэтиир.


Өймөкөөҥҥө оскуола дириэктэрдэрин түмсүүтүгэр СӨ Ил Дарханын “Саха Өрөспүүбүлүкэтигэр үөрэхтээһин сайдыытын стратегическай хайысхаларын туһунан” Ыйааҕын тула киэҥ кэпсэтии таҕыста.

Ыйаах үс сүрүн сыаллаах – үөрэх хаачыстыбатынан 15 бастыҥ эригийиэннэр ахсааннарыгар киирии; оҕолор талааннарын, дьоҕурдарын арыйыы уонна сайыннарыы; оҕо кыра эрдэҕиттэн үтүө сиэргэ-майгыга иитиллэн тахсарын, норуот култууратын, үгэһин, тылын-өһүн сайыннарар туһугар усулуобуйаны тэрийии.  Педагогическай үлэһиттэр идэлэрин таһымын үрдэтэр уонна аккредитацияны ааһалларыгар аналлаах кииннэр баар буолуохтаахтара Ыйаахха этиллэр. Дириэктэрдэр Сэбиэттэрэ Ил Дархан Ыйааҕын олоххо киллэрэргэ ыытыллар үлэ резолюциятын ылынарга үлэлэстэ, хас биирдии пуунугар эбэһээтэлистибэ ылылынна.

2024 с. дылы Өймөкөөн улууһугар үөрэхтээһини сайыннарыыга концепция бигэргэннэ. Үөрэнээччилэр талааннарын сайыннарарга Өймөкөөн улууһун бары үөрэх тэрилтэлэригэр эбии үөрэхтээһин үлэтин күүһүрдэр сорук турар.

Дириэктэрдэр Сэбиэттэрэ хас биирдии оскуола эбии үөрэхтээһиҥҥэ бэйэтэ туспа хайысхалаах буолуохтааҕын чопчулаата.

Сордоҥноох орто оскуолата агропрофильнай хайысханан үлэлиир, Өймөкөөн – Чысхаан оскуолата, Үчүгэйгэ – “Оскуола-бизнес-инкубатор” хайысханан салайтарыахтара, оттон Төрүт орто оскуолата – Олоҥхо оскуолата. Хас биирдии оскуола тустаах былаанын олоххо киллэрэргэ номнуо күүстээх үлэни саҕалаата.

Ааптар: Надежда КОРЯКИНА

Добавить комментарий

Ваш e-mail не будет опубликован. Обязательные поля помечены *