Күндээдэ оскуолатын 1983 сыллаахха бүтэрбиттэр дьыссаакка бэлэх оҥордулар

Күндээдэҕэ Саҥа сылы көрсө олохтоох уһуйааҥҥа кырачааннар Моруос оҕонньору ырыа-хоһоон, үҥкүү-битии, көрдөөх оонньуу бэлэмнээн көрүстүлэр, бэлэх ылан үөрдүлэр-көттүлэр. Быйыл оҕолор дьыссаат урукку иитиллээччилэриттэн, билигин эбэ-эһэ буолбут дьонтон эмиэ бэлэх туттулар.

---

Ньурба улууһун Күндээдэтин дьыссаатыгар бырааһынньыкка бэлэмнэнэн маскарад кэтии, киэргэнии буолаары аҕай турдаҕына уп-улахан тутуурдаах дьон киирдилэр. «Эһиэхэ бадаарак аҕаллыбыт», — диэн соһуччу үөрүү кыымын сахтылар.

Оскуола дириэктэрин үөрэх чааһыгар солбуйааччы Наталья Петровна Обулахова бэрт сэргэх тэрээһини ыыта сылдьалларын кэпсээтэ. Күндээдэ оскуолатын 35 сыл анараа өттүгэр бүтэрбит оҕолор үбүлүөйдэрин үтүө дьыаланан бэлиэтииллэр. Бастаан балаҕан ыйыгар оскуолаҕа оҕолорго анаан кулер туруорбуттар, оттон оскуоланы 1983 сыллаахха бүтэрбит выпусниктар өрөспүүбүлүкэтээҕи «Үтүө дьыала» хамсааһыныгар кыттыһан, сэттэ бииргэ үөрэммиттэригэр биир-биэс харчыта суох муус ылан, тиэйэн киллэрэн биэрбиттэр.

«Саҥа дьыл бастакы улахан бэлэҕин — сухой бассейны, мозаика көбүөрү, улахан конструкторы — биһиэхэ сүгэн-көтөҕөн кэлбиттэр. Оҕолор, үлэһиттэр бэртээхэй кэһиини туттарбыт Наталья Обулахованан, Надежда Саввинованан, Антонида Кураеванан, Вера Иванованан сирэйдээн, 1973 сыллаахха билии боруогун аан бастаан атыллаан, «А»-тан саҕалаан ааҕарга, «1»-тэн тэптэн суоттуурга үөрэнэн, күн бүгүн араас идэлээх үлэһит, ытыктанар дьон буолан олорор 1983 сыллаах оскуолабыт выпусниктарыгар барҕа махталбытын тиэрдэбит. Үтүө санааҕыт үөрүүнү үксэтэ, саргыны салайа турдун диэн баҕа санаабытын этэбит«, — диэн Венера Степанова кэпсиир.

Ааптар: «Ньурба» хаһыат