Сунтаар бастыҥ үөрэнээччилэрэ наҕараадалары туттулар

Сунтаар бастыҥ үөрэнээччилэрэ наҕараадалары туттулар

Сунтаар улууһун үөрэнээччилэрэ үөрэххэ, араас таһымнаах олимпиадаларга, куонкурустарга, култуурунай тэрээһиннэргэ ситиһиилэрэ үгүс. Оскуолаларын, нэһилиэктэрин, улуустарын уопсастыбаннай олоҕор көхтөөхтүк кытталлар. Сыл түмүгүнэн бастыҥнары улуус баһылыга чиэстиир.


Сунтаар улууһугар быйыл эмиэ үөрэнээччилэри баһылык Харыйата түмтэ. Тохсунньу 11 күнүгэр бастыҥтан бастыҥ үөрэхтээх, уопсастыбаннай үлэҕэ көхтөөх, успуорка уһулуччу ситиһиилээх, олимпиадаҕа, араас куонкурустарга кыайыылаах, уопсайа 150-ча оҕо наҕараадалары туттулар.

Улуус баһылыга Анатолий Григорьевы, улуус баһылыгын социальнай уонна имиджевэй бэлиитикэҕэ солбуйааччы Гаврил Еремеев, үөрэх управлениетын началынньыга Альберт Иванов, успуорт уонна физическай култуура отделын начаалынньыга Семен Андреев, ыччат бэлиитикэтин отделын начаалынньыга Евгений Данилов, култуура уонна духуобунай сайдыы управлениетын исписэлииһэ Саргылаана Меркурьева эҕэрдэлээтилэр.

Баһылык Харыйатын кыттыылаахтарыгар минньигэс астаах фуршет, уоттаах-күөстээх дискотека тэрилиннэ. Оҕолор маннык үрдүк таһымнаах тэрээһиҥҥэ сылдьан, «Тещин язык» туристическай комплекска дуоһуйа сынньанан үөрэн-көтөн тарҕастылар.

Ааптар: Станислав Ноговицын.

Добавить комментарий

Ваш e-mail не будет опубликован. Обязательные поля помечены *