Өймөкөөн олохтоохторо улуус хаһыаттарыгар хото суруйтардылар

Өймөкөөн олохтоохторо улуус хаһыаттарыгар хото суруйтардылар

Бэчээт күнэ бэлиэтэнэр. Өймөкөөн олохтоохторо “Хотугу сардаҥа” хаһыакка “альтернативнай сурутуу” диэн тугун номнуо билэллэр. Тиэрдиитэ түргэн диэн ордороллор. Улуустааҕы хаһыаттары нэдиэлэ ахсын тиэрдэр киһибит – урбаанньыт Гаврил Сивцев. Кини хаһыс даҕаны сылын биир-биэс тыла суох хаһыаттарын ылан барбыта эрэ баар буолар.


Өймөкөөн нэһилиэгэр «альтернативнай сурутуунан» саамай элбэх киһи туһанарр. Бу – учуутал Агафья Готовцева өҥөтө. Педагог курдук уустук идэлээх киһи быыс булан дьонун-сэргэтин түмэ тардан, быйыл даҕаны “Хотугу сардаҥа” ааҕааччыта элбииригэр кылаатын киллэрдэ.

Библиотекардар: Төрүккэ — Нина Чачуа, Сордоҥнооххо — Мария Никифорова, Үчүгэйгэ — Наталья Громова сурутуунан дьарыктаналлар. Кинилэр ону таһынан хаһыакка нэһилиэккэ ыытыллар тэрээһиннэр тустарынан куруутун сырдаталлар.

Маннык энтузиаст дьон баар буолан, тыа сирин дьоно хаһыаттарын кэмигэр тута олороллор. Кинилэри Бэчээт күнүнэн итиитик-истиҥник эҕэрдэлээн туран, дьиэ кэргэттэригэр этэҥҥэ буолууну, чэгиэн доруобуйаны, айымньылаах үлэни баҕарабыт!

Хаһыаты оҕо айар дьоҕурун сайыннарарга туһанабыт. Кыра эрдэҕиттэн сахалыы сайа суруйарга уһуйан, кыракый ыстатыйаларын улуустааҕы хаһыакка ыытар педагогтар бааллар. Кинилэр хаһыаты үлэлэригэр сатабыллаахтык туһаналлара кэрэхсэтэр. Олортон биирдэстэрэ – Өймөкөөн орто оскуолатын эдэр учуутала Марианна Заровняева. Кини Бэчээт күнүн көрсө санаатын маннык үллэстэр.

— Мин кыра эрдэхпиттэн төрөппүттэрим араас хаһыакка суруйтараллара. Онтон улаатан, учуутал идэтин талан, бэйэм дойдум хаһыата үлэбэр да туһалаах буолуо диэн, сыл аайы хайаан даҕаны суруйтарабын. 6-7-с кылаас үөрэнээччилэригэр «Уран тыл» диэн куруһуогу салайан үлэлэтэбин. Оҕолору айар үлэҕэ уһуйабын, кыракый интервью ыларга үөрэтэбин. Мантан ураты иккис сылын «Дабаан» диэн нэһилиэк  айар куттаахтарын түмсүүлэрин салайабын. Кинилэри ситимнээн, «Дабаан» түмсүү киэн туттар дьонуттан оҕолорбун кытта тэҥҥэ сылдьан интервью ылабыт. Бу сүрдээх интэриэһинэй сырдатыы буолан тахсар диэн бэлиэтиэхпин баҕарабын. Холобур, биһиги нэһилиэкпитигэр олорор биир дойдулаахпыт П.Н. Ксенофонтов Саха сирин суруйааччыта.  Оҕолор кини суруйааччы буоларын билбэттэрэ. Прокопий Николаевиһы көрсөн интервью ылбыттара бастаан оскуолабыт иһинэн тахсар хаһыакка, онтон улуус сахалыы тыллаах “Хотугу сардаҥа” хаһыатыгар бэчээттэммитэ, сыралаах үлэбитигэр сүҥкэн суолта биэрбитэ.

Уһуйар оҕолорум матырыйааллара улуустааҕы хаһыакка таҕыстаҕына олус үөрэллэр, араас сонуну билээри хаһан хаһыат кэлэрин кэтэһэллэр. Билигин оскуола оҕотугар портфолио диэн ирдэнэр. Онон кинилэргэ хаһыат наадалаах, ааҕарга интэриэстээхтэр.

Иккис үлэм — социальнай педагог. Дьиэ кэргэн оскуола олоҕор улахан оруоллаах. Төрөппүттэр оскуоланы кытта ыкса ситимнээхтик үлэлииллэр, кинилэр баар буолан, араас тэрээһиннэрбит көхтөөхтүк ааһаллар. Үлэм бу хайысхатын салгыы улуус хаһыаттарыгар сырдатар былааннаахпын.

Оҕону айар үлэҕэ угуйууга миигин кынаттааччынан учуутал, уопуттаах общественнай кэрэспэдьиэн А.С. Готовцева буолар. Киниэхэ тыл-өс буолан, сүбэ-ама биэрэригэр улахан махталбын тиэрдэбин. Агафья Степановнанан киэн туттабын, кини миэхэ куруутун үтүө холобур.

Улууспут хаһыатыгар тыа сирин боростуой үлэһит дьонун олоҕун-дьаһаҕын хото сырдаталлара буоллар диэн баҕа санаабын этэн туран, хаһыат үлэһиттэрин, бары общественнай кэрэспэдьиэннэри Бэчээт күнүнэн эҕэрдэлиибин! Суруйар бөрүөҕүт сытыы буоллун, өссө элбэх интэриэһинэй матырыйааллары бэчээттээҥ, суруттарааччыгыт эбиллэ турдун.

Ааптар: Любовь КРИВОШАПКИНА

Добавить комментарий

Ваш e-mail не будет опубликован. Обязательные поля помечены *