Сунтаарга оҕуруотчуттар уонна сибэккини үүннэрээччилэр сэминээрдэрэ ыытылынна

«Сыарҕаҕын сайын бэлэмнээ» диэн мээнэҕэ этиллибэт. Бэҕэһээ, ол эбэтэр тохсунньу 12 күнүгэр, Сунтаар сэлиэнньэтигэр, олохтоох дьаһалта итиэннэ оҕуруоту, сибэккини үүннэрээччилэр уопсастыбаннай Сэбиэттэрин тэрийиилэринэн, оҕуруотчуттар уонна сибэккини үүннэрээччилэр сэминээрдэрэ тэрилиннэ.

edersaas.ru


Сэминээргэ өрөспүүбүлүкэҕэ киэҥник биллэр оҕуруотчуттар: Ньурба Антоновкатыттан Агафья Тарасова, Сунтаар олохтоохторо Татьяна Джанова, Галина Попова уонна Николай Семенов оҕуруоту олордууга, сибэккини үүннэриигэ, саады оҥорууга, агродизайнҥа маастар-кылаас ыыттылар, бэйэлэрин өр сыллаах үөрүйэхтэрин үллэһиннилэр, ыйытыыларга хоруйдаатылар. Улуус кииниттэн уонна чугастааҕы нэһилиэктэртэн барыта сүүстэн тахса киһи кэлэн кинилэр сүбэлэрин болҕойон иһиттилэр, удамыр сыанаҕа оройуоннаммыт сибэкки уонна оҕуруот аһын сиэмэлэрин, оҥоһуллубут буору, биогумуһу атыыластылар.

— Сэминээри бэркэ тэрийбиттэрин иһин Сунтаар дьаһалтатыгар, чуолаан Хаптасов Василий Николаевичка махталбын тиэрдэбин. Бэйэ тиэргэнигэр эрэ буолбакка, уопсастыбаннай сирдэргэ уонна былаһааккаларга сибэккини, декоративнай мастары олордуу билиҥҥи кэмҥэ олус наадатын таба өйдөөн, дьаһалта бэйэтинэн көҕүлээн, дьону мунньан маннык сэминээрдэри тэрийэрэ хайҕаллаах итиэннэ атыттарга үтүө холобур буолар, – диир Агафья Тарасова.

Раиса СИБИРЯКОВА, «Саха сирэ» хаһыат, edersaas.ru

0
0

Добавить комментарий

Ваш e-mail не будет опубликован. Обязательные поля помечены *