media2018 сыл ахсынньы 31 күнүгэр, Саҥа дьыл үүнэр түүнүгэр, Сунтаар улууһун Кэмпэндээйи бөһүөлэгин Култуурунай-спортивнай киинин дьиэтэ бүтүннүү уокка былдьанан, улуус эрэ буолбакка, бүтүн өрөспүүбүлүкэ дьоно улаханнык соһуйбута, хомойбута.
edersaas.ru
Иэдээн тахсыбытын туһунан куһаҕан сурах өрөспүүбүлүкэҕэ тарҕанан, көмөлөһүөн баҕалаах дьон элбэҕэ тустаах дьон санаатын уоскутар. Ол да буоллар,”отонноотоххо оҥоойук туолар” дииллэринии, кэмпэндээйилэр бар дьонноругар таһаарбыт ыҥырыыларын бэчээттиибит.
Анна Фомична ТОТОНОВА, «Сайдыы» култуурунай-спортивнай киин дириэктэрэ, СӨ култууратын туйгуна, «Үрдэл-2016» национальнай музыкальнай бириэмийэ кыайыылааҕа, «Сыл бастыҥ киһитэ-2016», өрөспүүбүлүкэтээҕи куонкурус «Тыа сирин киэн туттуута» номинациятын кыайыылааҕа, Сунтаар улууһун ырыа айааччыларын салайааччыта, «2017 с. кулууп үлэтин бастыҥ менеджерэ”, Кэмпэндээйи нэһилиэгин бочуоттаах олохтооҕо:
— 2018 сыл бүтэһик күнүгэр Саҥа Дьыллааҕы үөрүүлээх бырааһынньыкпытын тэрийээри сырыттахпытына, киэһэ 6 ч. ааһыыта дууһабытын ууран, оҕолуу бүөбэйдээн өрөмүөннээбит икки мэндиэмэннээх, спорт саалалаах кулууппут аҕыйах чаас иһигэр уокка былдьанан, умайан хаалла.
Манна 618 кв.м. иэннээх кулууп, физкультура саалата бааллара. Дьиэбит умайбытын, күлүн көрөн баран, киһи олох туттуммакка хомойон ытыыр. 2004 сылтан саҕалаан, олоҕум үтүө кэмнэрин, эдэр сааһым сылларын манна анаабытым номнуо 15 сылыгар бара охсубут.
Ыарахан кэмнэргэ киһиэхэ олох кыра да наада эбит. Бэйэҥ эрэ буоллаххына, син биир санаа баттыга буолаҕын, ол эрэн дьон тус бэйэбэр суруйбут истиҥ тылларыттан санаам бөҕөхсүйэр. «Киһи санаа кулута» диэн итини этэн эрдэхтэрэ. «2018 сыл бүтүүтэ хомолтолоох түбэлтэ таҕыстар да, 2019 сылга үчүгэй сыл буолуо» диэн санаабын көтөҕөллөр. Оннук эрэ буоллун!
Быйыл кулууп үлэһиттэрэ бэйэбит хас да күнү быһа дууһабытын ууран туран кулууппутун киэргэппиппит. Истиэнэбит саҥа бүрүллүбүт буолан, баннер эҥин сыстыбат этэ. Ол иһин, элбэх да элбэх хаары кырыйан, былаачыйалаах кыыһы улахан истиэнэҕэ уруһуйдаан ыйаан, ол кыыспыт араас быһыылаах хаарынан «кулуубу барытын ыһан кэбиспитэ». Эдэр ыччаттар кэнсиэркэ бэлэмнэнэ кэлэ сылдьан, киэргэтиини кыайа туппуккут диэн хайҕаабыттара. Саатар хаартыскаҕа түһэрбэтэхпит, видеоҕа устубатахпыт. Онуоха бэйэм бытаарбыппыттан хомойобун, кыһыйабын…
Физкультура саалатыгар оскуола үөрэнээччилэрэ, нэһилиэк бары араҥата мустан дьарыктанара. Спорт көрүҥнэригэр элбэх ситиһиилээх этилэр. Быйыл кулууппут ис өттүн бүрүөһүннээбиппит (обшивкалаабыппыт), бэдэрээччиттэрбитигэр бэркэ табыллыбыппыт. Сэтинньи ыйга бириэмэтигэр туттарсан отчуоттаабыппыт. «Кэлэр көлүөнэ пуондата” көмөлөһөн, 500 тыһыынча суумаҕа спорт араас тэрилин ылбыппыт. Инники былааммыт олус киэҥ этэ. Ханна баарый?! Итинник буолуо эрэ дии санаабатахпыт буоллаҕа!…
Күүстээх өрөмүөн үлэтин хаамыытын, үлэ түмүгүн барытын, үөрүүбүтүн үллэстэн ватсап, инстаграмм, фейсбук ситимин нөҥүө бөлөҕүм дьонугар ыыталыы олорбутум. Оттон билигин… «бириэмэ эмтиир» диирбитигэр эрэ тиийэбит.
20 сыллааҕыта «Эриэхэ бэтиэхэ» бөлөҕүн тэрийэ сылдьыбыппыт. 1998 сыллаахха куоракка көр-күлүү куонкуруһугар Гран-При буолбатахпыт наһаа кыһыылаах этэ. I истиэпэннээх лауреаттар буолбуппутугар хас да киһиэхэ бэлисипиэт биэрбиттэрэ.
Бу сыл Арассыыйаҕа Тыйаатыр сыла биллэриллэн, ааппытын уларытан, «Тууһаммыт кумаардар» диэн көр-күлүү киэһэтин ол киэһээ тэрийиэхтээх этибит. Саатар саамай сүрүн бэлэмнэниигэ артыыстарбыт туох баар атрибуттарын барытын илдьибиттэрэ бүтүннүү умайан хаалаахтаата. Куораттан Куукула тыйаатырыттан ылбыппыт эмиэ барыта уокка былдьанна. Уопсайынан, туох да мал-сал, тэрил быыһаммата. Турар бэйэбит нэһиилэ куотан тахсыбыппыт. СӨ Култуураҕа уонна духуобунуска министиэристибэтэ биэрбит сыаналаах аппаратурабыт да быыһаммата. Дьолго, ким да эмсэҕэлээбэтэҕэр махтана саныыбыт.
Сарсыныгар, тохсунньу 1 күнүгэр, “Саха” НКИХ биэриитигэр «Үҥкүүлүүр Туус Кэнэли» кэнсиэрбитин көрдөрбүттэрэ. Ити быһылаан кэнниттэн билэр дьонум, биир идэлээхтэрим көмөлөһөллөрүн туһунан бэйэбэр да, бөлөххө да көмөҕө илиилэрин ууналларын биллэрдилэр. Аһымал кэнсиэр көрдөрөн, төһө кыалларынан көмөлөһүөхпүт диэн эрэннэрдилэр. «Отонноотоххо оҥоойук туолар» диэн өбүгэлэрбит этэн хаалларбыт өс хоһоонноро бу маннык түгэҥҥэ олус тоҕоостоох. Саатар муусука тэрилэ да суох хаалаахтаабыппыт олус кыһыылаах, абалаах! “Наһаа элбэх үлэ, субуотунньук ыытыллыбыта, саҥа тэрил арааһа ылыллан, кулууппут иккис тыыннанан, үлэлиэх-хамсыах санаабыт өссө күүһүрэн, инники былааннар олус элбэхтэр этэ. Ханна баарый?! Олох дууһабыт, сүрэхпит ыалдьар! Утуйар уубут умнулунна! Аттыбытыгар чугас дьоммут, оҕолорбут, нэһилиэнньэбит дьоно баар буоланнар уоскуталлар. Нэһилиэкпит ыарахан кэмигэр «Күн киһитэ көмүскэс, айыы киһитэ аһыныгас» диэнинэн салайтаран, өрөспүүбүлүкэбит дьонуттан-сэргэтиттэн көмө көрдүүбүт. Төһө сатанарынан, кыаххыт баарынан, тэрилтэ счетугар көмөҕүтүн ыытаргытыгар көрдөһөбүт. Саҥа кулууп тутулларыгар элбэх үп-харчы эрэйиллэр. Таах олорон хаалбакка, кыахпыт төһө баарынан үлэни саҕалыахпыт.
Тэрилтэ реквизитын ыытабыт:
Инн 1424008277
кпп 142401001
Бик 049805001
Рс 40701810998051000055
Отделение-НБ Республики Саха Якутия
ОКТМО 98648425
Кбк 00000000000000000189
УФК по Республике Саха (Якутия) (СП «Кемпендяйский наслег») (МБУ КСЦ «Сайдыы» л/с 20272000267)
Көмөлөһөр дьоммутугар улахан махталбытын ыытабыт. Баҕарабыт сир үрдүгэр баар туох баар үчүгэйи, сырдыгы, үөрүүнү-көтүүнү!
Надежда ЕГОРОВА, “Саха сирэ”хаһыат, edersaas.ru
Сүрүн хаартыска: интэриниэттэн
