Иннокентий Макаров кэриэһигэр анаммыт кинигэ сүрэхтэниитэ буолла

Олунньу 1 күнэ — биллиилээх спортсмен, кикбоксиҥҥа аан дойду үс төгүллээх чөмпүйүөнэ, «Сатал» СОНТ бэрэссэдээтэлэ Иннокентий Макаров төрөөбүт күнэ. Иннокентий баара буоллар, 44 сааһын туолуохтааҕа… Бу бэлиэ күн Дьокуускай куорат А.Е.Кулаковскай аатынан Норуоттар доҕордоһууларын дьиэтигэр «Тулхадыйбат дьулуур» («Непоколебимый дух») диэн ааттаах кини кэриэһигэр анаммыт кинигэ сүрэхтэниитэ буолла.

edersaas.ru

Тэрээһин Иннокентийы ахтан-санаан, биир мүнүүтэ кэриэстээн турууттан саҕаланна…

Кинигэни хомуйан таһаарбыт ааптардартан биирдэстэрэ, Иннокентий ийэтин бииргэ төрөөбүт эдьиийэ Александра Степанова бу «буруолуу сылдьар» саҥа кинигэни субу туппуттарын, ахтыы кинигэтэ уопсай сүбэнэн, чугас аймах-билэ дьонун, спортсменнар, доҕотторун көмөлөрүнэн күн сирин көрбүтүн махтана иһитиннэрдэ.

Кинигэҕэ чаҕылхайдык олорон ааспыт саха чулуу уола, албан ааттаах кикбоксер, уопсастыбаннай деятель, меценат, өрөспүүбүлүкэ кикбоксиҥҥа федерациятын вице-президенэ, «Сатал» СОНТ бэрэссэдээтэлэ Иннокентий Васильевич Макаров тапталлаах оҕо, амарах аҕа, күндү убай, быраат, эрэллээх доҕор быһыытынан эдэр дьоҥҥо холобур буолар олоҕо, оҕо, эдэр сааһын доҕотторун, бииргэ алтыспыт үөлээннээхтэрин, спортсменнар, приедпринимательство эйгэтигэр эҥэрдэспит уонна аймах-билэ дьонун — сүүһүнэн истиҥ-иһирэх ахтыылара, сэдэх хаартыскалар киирбиттэр. Биэс түһүмэхтээх: «Дьоллоох оҕо саас», «Студент кэрэ кэмнэрэ», «Спорт үрдүк чыпчаалын дабайыы», «Үлэ-үөрэх аартыктарынан», «Дьиэ кэргэнэ».

Александра Гаврильевна бэлиэтииринэн, кинигэҕэ өрөспүүбүлүкэ таһыттан — Санкт-Петербург куораттан, Москваттан, Благовещенскайтан, Хабаровскайтан, Ханты-Мансийскай уокуруктан, ону сэргэ,Пекинтэн ахтыылар киирбиттэр. Кинигэни М.К.Аммосов аатынан ХИФУ кинигэтин кыһата оҥорон-бэчээттээн таһаарбытыгар истиҥ махтал тылларын тиэртэ.

Бу дьоро киэһэ Иннокентий чугастык алтыспыт дьоно, доҕотторо — СӨ Экологияҕа, айылҕа баайын туһаныыга уонна ойуур хаһаайыстыбатыгар миниистирэ Сахамин Афанасьев, СӨ спордун үтөүлээх үлэһитэ Александр Попов, өрөспүүбүлүкэтээҕи аҕалар түмсүүлэрин салайааччыта Айхал Габышев, СӨ тырааныспарга миниистирин солбуйааччыта Алексей Филиппов, Р.Дмитриев аатынан Олимпийскай эрэл училищетын дириэктэрэ Алексей Филиппов, биир дойдулаахтара томполор, бииргэ үөрэммит кылааһынньыктара, спортсменнар Иннокентий туһунан сылаастык ахтан туран, кини дьон туһугар кыһамньытын, ураты майгытын, ситиһиигэ дьулуурун, киһи быһыытынан үтүө хаачыстыбаларын бэлиэтээтилэр.

Иннокентий ийэтэ Тамара, аҕата Василий Макаровтар кинигэ тахсыытыгар сүүрбүт-көппүт, көмөлөспүт, кылаатын киллэрбит дьоҥҥо барыларыгар ис сүрэхтэриттэн долгуйа махтаннылар.

Бу бэлиэ тэрээһин түмүгэр, Иннокентий Макаров аатын үйэтитэргэ хас да этии киирдэ, ол: кини сырдык кэриэһигэр Бүтүн Россиятааҕы турнир ыытары туруорсуохха, кинигэни аны нуучалыы тылынан таһаарыахха, Мэҥэ Алдан оскуолатын бастыҥ выпускнигар стипендия олохтуохха диэн. 

Санатар буоллахха, Иннокентий Макаровы 2017 сыл сэтинньи ыйыгар Дьокуускай куоракка өлөрбүттэрэ… өлөрүөхсүт 9 сылга хаайыыга барбыта.

Вера Макарова, «Саха сирэ» хаһыат, edersaas.ru

Хаартыскалар: ааптар түһэриилэрэ.

0
0

Добавить комментарий