Дипломат күнүн көрсө

Дипломат күнүн көрсө, СӨ Бырабыыталыстыбатын 2-с №-дээх дьиэтигэр, бэртээхэй тэрээһин ыытылынна. Бу туһунан биһиэхэ СӨ Тас сибээскэ уонна норуоттар дьыалаларыгар министиэристибэтин пресс-сулууспатыттан иһитиннэрдилэр. 


Дьокуускайга Арассыыйа Тас дьыалаларга министиэристибэтин бэрэстэбиитэлистибэтэ «Объединение по продвижению и консолидации народной дипломатии, «Интерсфера» уопсастыбаннай тэрилтэтэ тэрийдилэр. Тэрээһиҥҥэ, үгэс курдук,  СӨ Тас сибээскэ уонна норуоттар дьыалаларыгар министиэристибэ үлэһиттэрэ көхтөөхтүк кытыннылар.
Бастатан туран дебат сүрдээх сэргэхтик ыытылынна. Турнирга аан дойду политикатыгар тирээн турар боппуруостары дьүүллэстилэр, өрөспүүбүлүкэ соиальнай-экономическай сайдыытын ырыттылар.  Билиини-көрүүнү тургутуулаах  күөн күрэс кэнниттэн, түмүккэ икки хамаанда финалга таҕыста.
Экономическай боппуруоска сыһыаннаах кытаанах мөккүөрдээх, илин-кэлин түсүһүүлээх, эгил-тэгил киирсиилээх күрэс кэнниттэн, СӨ Тас сибээскэ уонна норуоттар дьыалаларыгар министиэристибэ сүрүн исписэлииһэ Валентина Иванова, ХИФУ устудьуоннара, «Интерсфера» уопсастыбаннай тэрилтэ чилиэннэрэ Владислав Адамов  уонна Максим Саввин састааптаах хамаанда кыайыылааҕынан таҕыста.
Маны сэргэ, «Туох? Ханна? Хаһан?» оонньуу олус көхтөөхтүк, сэргэхтик ыытылынна. Оонньууну ыытааччы биэрбит ыйытыытыгар мүнүүтэ иһигэр сөптөөх хоруй бэриллиэхтээх. Ыытааччы Борис Крюк оруолун Арассыыйаҕа МИД дипломатическай академиятын 3 кууруһун устудьуона, «Будущий дипломат» 2016  сыл кыайыылааҕа Артем Инхеев толордо.
Сэргэх уонна туһалаах тэрээһинтэн бары улаханнык астынан, үөрэн-көтөн тарҕастылар.
СӨ Тас сибээскэ уонна норуоттар дьыалаларыгар министиэристибэ пресс-сулууспата.
2
0

Добавить комментарий