media
А.Е.Кулаковскай аатынан норуоттар доҕордоһууларын дьиэтигэр, олунньу 10 күнүгэр, Илиҥҥи Саҥа дьыл бырааһынньыга аан бастаан тэриллэрин туһунан иһитиннэрэллэр. Азия дойдуларыгар бу бырааһынньыгы олунньу 5 күнүттэн саҕалаан, 14 хонугу быһа ылаллар диэн бэлиэтииллэр.
Бырааһынньыкка кэлбит ыалдьыттарга чэй быыстапка-атыыта тэриллэр. Онон сөбүлүүр чэйгитин атыылаһан барыаххыт. Маны сэргэ, күнүс 15:00 чаастан чэй церемонията, итиэннэ бу сылга туох күүтэрин билгэлээн, этэн туран, минньигэһинэн күндүлүөхтэрэ диэн иһитиннэрэллэр. Салгыы Корея уонна Кытай эдэр ырыаһыттара, Дьокуускай куораттан үҥкүү кэлэктииптэрэ кыттыылаах бэртээхэй кэнсиэр ыытыллыа, сүүйүүлээх оонньуу болҕомтону тардыаҕа.
Илиҥҥи Саҥа дьыл саҥа саас саҕаламмытын, айылҕа уһуктуутун, үүнээйини олордуу кэмэ кэлбитин кэрэһилиир. Кыһын сааһы кытары көрсөр диэн этэллэр.
Илиҥҥи Саҥа дьылга кыһыл өҥү өрө туталлар. Кыһылтан куһаҕан дьай куттанар, бу өҥ дьолу уонна ситиһиини аҕалар диэн итэҕэллээхтэр.
Күндү ыалдьыттары атастарын, доҕотторун кытары А.Е.Кулаковскай аатынан норуоттар доҕордоһууларын дьиэтигэр күүтэллэр.
0
0
