mediaСомоҕолоһуу сылыгар Мэҥэ Хаҥалас оройуона төрүттэмитэ 89 сылын бэлиэтиир. Бырааһынньыктааҕы тэрээһиннэр чэрчилэринэн олунньу 11 күнүгэр Дьаҥхаады нэһилиэгин Төхтүр сэлиэнньэтигэр 50 миэстэлээх “Мичил” оҕо саадын саҥа дьиэтин арыйдылар. Бу дьиэ “Мин Сахам сирэ 21 үйэҕэ” үтүө дьыала өрөспүүбүлүкэтээҕи хамсааһын чэрчитинэн тутуллубута.
Саха Өрөспүүбүлүкэтин Ил Дарханын уонна бырабыыталыстыбатын аатыттан бастакы вице-премьер Алексей Стручков эҕэрдэлээтэ. “Кэнники сылларга өрөспүүбүлүкэҕэ социальнай эбийиэктэр тэтимнээхтик тутуллаллар: оҕо саадтара, оскуолалар, эмп тэрилтэлэрэ уонна култуура дьиэлэрэ. 2018 сыл түмүгүнэн өрөспүүбүлүкэ сиригэр-уотугар 10 саҥа оскуола уонна 23 оҕо саада тутулунна. Быйыл 10 оскуоланы уонна 27 оҕо саадын тутар соруктаахпыт. Өрөспүүбүлүкэ салалтата саҥа социальнай эбийиэктэри куораттарга уонна тыа сиригэр тутууну өссө күүскэ ыытар баҕалаах”, — диэтэ бастакы вице-премьер.
Кини Ил Дархан Айсен Николаев былырыын “Тыа хаһаайыстыбатын сайдыытын стратегическай хайысхаларын туһунан” Ыйаахха илии баттаабытын, ити чэрчитинэн билигин тустаах министиэристибэ тыа сирин кэлимник сайыннарыы өрөспүүбүлүкэтээҕи бырагырааматын саҥа редакциятын бэлэмниирин туһунан санатта. “Өрөспүүбүлүкэ бырагырааматын сүрүн сыалынан тыа сиригэр дьон олороругар табыгастаах усулуобуйаны тэрийии буолар, балары олоххо киллэрии тыа сирин сайдыытыгар төһүү буолуоҕа”, — диэн Алексей Стручков бэлиэтээтэ.
Оҕо саадын үөрүүлээхтик арыйыыга норуот дьокутааттара Феодосия Габышева, Юрий Баишев уонна Андрей Находкин кытыннылар. Кинилэр Сомоҕолоһуу сылыгар “Мин Сахам сирэ XXI үйэҕэ” үтүө дьыала чэрчитинэн социальнай эбиийэктэри арыйыы хаһааҥҥытааҕар даҕаны өрөспүүбүлүкэ тыатын сирин олохтоохторун түмүөхтээх диэн бэлиэтээтилэр. “Сомоҕолоһуу, таһаарыылаах үлэ көмөлөрүнэн өрөспүүбүлүкэбит социальнай-экономическай сайдыытын бөҕөргөтүөҕэ уонна ситиһиилэрин үксэтиэҕэ”, — диэтэ Андрей Находкин.
“Мичил” оҕо саадын сэбиэдиссэйэ Надежда Романова иитиллээччилэр уонна педагогтар ааттарыттан Саха Өрөспүүбүлүкэтин Ил Дарханыгар Айсен Николаевка уонна өрөспүүбүлүкэ бырабыыталыстыбатыгар саҥа оҕо саадын тутуу иһин махтанна.
Үөрүүлээхтик арыйыы сиэригэр-туомугар сэлиэнньэ олохтоохторо уонна бу тэрилтэ урукку выпускниктара кытыннылар. Балар ортолоругар “Мичил” оҕо саадын бастакы сэбиэдиссэйэ, Саха Өрөспүүбүлүкэтин үөрэҕириитин туйгуна Татьяна Ларионова баар. “Мин биир идэлээхтэрим бүгүн Мэҥэ Хаҥалас үүнэр көлүөнэтин аныгы дьоһун усулуобуйаҕа иитэр уонна үлэлиир кыахтаммыттарыттан үөрэбин. Биһиги оҕо саадпыт оҕоҕо саха норуотун тылынан уус-уран айымньытыгар, култууратыгар, үгэстэригэр тапталы иҥэрэр, чэгиэн уонна духуобунай өттүнэн баай көлүөнэни иитэр. Оҕо саадын иитиллээччилэрэ бары улуустааҕы уонна өрөспүүбүлүкэтээҕи куонкурустарга кыттан, бириистээх миэстэлэргэ тиксэллэр, лауреат, дипломант буолаллар. Эдэр кэллиэгэлэрбэр айымньылаах, таһаарылаах үлэни баҕарабын”, — диэн эҕэрдэтин тириэртэ Татьяна Петровна.
Оҕо саадыгар үс бөлөҕү тэрийиэхтэрэ: орто, үрдүк уонна бэлэмнэнии. Оҕолор айар уонна спорка дьулуһууларыгар көмөлөһөр муусука уонна физкультуура саалалара толору таҥылыннылар, хас биирдии бөлөххө оонньуур зоналар баар буолуохтара. Куукуна, таҥас сууйар сир, методист кабинета бааллар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин бырабыыталыстыбатын пресс-сулууспата
