Эстрада судаарыстыбаннай тыйаатыра хаһыс да төгүлүн музыкальнай испэктээкиллэри туруорар. Испэктээкиллэр көрөөччү биһирэбилин ылыан ыллылар. Кэрэхсэбиллээҕэ диэн, маннык музыкальнай испэктээкиллэр тиэмэлээх, эбэтэр ханнык эрэ бэйиэт айымньыларыгар олоҕурбут буолаллар.
edersaas.ru
Кулун тутар 1 күнүгэр Эстрада тыйаатыра «Уйбаанчык» диэн музыкальнай испэктээкилгэ ыҥырар. Испэктээкил Ойуунускай аатынан Саха академическай тыйаатырын сыанатыгар буолар.
Манна сэриигэ барбыт эдэркээн Уйбаанчык уол тиһэх күннэрэ кэпсэнэллэр. Кини бастакы кыргыһыытыгар, саатар, биирдэ да ыппакка эрэ, өлөр дьылҕалаах эбит. Кини бу күннэргэ олоҕун кэрэ-бэлиэ түгэннэрин ахтар-саныыр. Хараҕар кэргэнэ, ийэлээх аҕата, эһээтэ, доҕотторо, төрөөбүт алааһа көстөллөр. Уйбаанчык тапталын санаан ытыыр-ыллыыр, иэйэр-куойар.
Сүрүн оруолу артыыс Кеша Лебедев толорор. Испэктээкил норуодунай бэйиэт Леонид Попов төрөөбүтэ 100 сылыгар уонна бары фронтовик-бэйиэттэргэ ананар. Кини суруйбут хоһоонноругар айыллыбыт өлбөт-сүппэт ырыалара ылланаллар: “Илиибэр эн илииҥ баар курдук”, «Кини дуо, мин кэрэ аналым», «Ханна көрдүм этэ мин?», «Эйиэхэ», “Илиибэр эн илииҥ суох буолла”, “Илиибин уунабын эйиэхэ”, о.д.а.
Оруолларга Александр Бурнашов, Ника, Айгылаан, Николай Гоголев, Умсуура, Амгаяна, Анатолий Горохов, Санита Ай, Эрхаан, Эрчим оонньууллар. Ол эбэтэр кинилэр оонньуулларын таһынан, ураты куоластарын истиэхпит.
Туруорааччы режиссер – Сергей Потапов.
Испэктээкил киэһэ 5 уонна 8 чаастан саҕаланар.
Ангелина Васильева, “Саха сирэ” хаһыат, edersaas.ru