Өймөкөөн учууталларын “Үөрэхтээһин” национальнай бырайыак сомоҕолуур

Соторутааҕыта Томтор сэлиэнньэтигэр Н.М. Заболоцкай-Чысхаан аатынан орто оскуола уонна “Кэскил” уһуйаан баазатыгар улуус педагогтарын олунньутааҕы сүбэ мунньахтара ыытылына. Сомоҕолоһуу сылыгар «Үөрэхтээһин» национальнай бырайыагы олоххо киллэриигэ туһуламмыт  тэрээһиҥҥэ Өймөкөөн улууһун сэттэ нэһилиэнньэлээх пуунуттан уопсайа 80 учуутал уонна иитээччи кытынна.

---

Өймөкөөн кэнчээри ыччатын үөрэтэр, иитэр педагогтар сүбэ мунньахтарын сүрүн тиэмэтэ – “Өймөкөөн улууһугар “Үөрэхтээһин” национальнай бырайыагы олоххо киллэрии”. Бу суолталаах боппуруоска анаммыт секцияҕа үөрэх тэрилтэлэрин салайааччылара түмүстүлэр. Маны таһынан учууталлар икки күн устата 6 секциянан арахсан үлэлээтилэр. Итиэннэ эһиил бэлиэтэнэр Өймөкөөн улууһа төрүттэммитэ 100 сылын көрсө спорт араас көрүҥнэригэр спартакиада ыытылынна.

Тыа сиригэр буолбут тэрээһиҥҥэ Аартык бөһүөлэгиттэн уонна Уус-Ньаратааҕы “Пегас” оҕо айар дьоҕурун сайыннарар киинтэн педагогтар аан бастакытын кытыннылар уонна нэһилиэк оскуолаларын үлэтэ “оргуйан” олорорун биһирээтилэр.

40 иитээччи “Кэскил” уһуйааҥҥа түмсэн “Оскуолаҕа киириэн иннинээҕи саастаах оҕо тэрилтэтин кыһалҕалара уонна инники сайдыыта” диэн тиэмэҕэ үлэлээтилэр.

Икки күн устата “төгүрүк” остуол, маастар кылаастар, араас былаһааккаларга киэҥ кэпсэтиилэр таҕыстылар. Мунньах пленарнай мунньаҕар Өймөкөөн улууһугар Үөрэх управлениетын салайааччыта Алексей Егоров кэллиэгэлэригэр салгыы да таһаарыылаахтык үлэлиир-хамсыыр соруктары өссө төгүл туруорда уонна үлэ бастыҥнарын наҕараадалаата.

Матырыйаалы сиһилии “Хотугу сардаҥа” хаһыат олунньу 15 күнүнээҕи нүөмэригэр ааҕыҥ.

 Ааптар: Любовь КРИВОШАПКИНА

Мария Винокурова хаартыскаҕа түһэриитэ