Бороҕоҥҥо саха тылын күнүн бэлиэтээтилэр

Бүгүн Саха сирин үрдүнэн саха тыла, суруга-бичигэ бэлиэтэнэр. Бороҕоҥҥо “Өркөн” эбии үөрэхтээһин киинигэр, улуустааҕы култуура салалтата, С.С. Васильев–Борогонскай аатынан киин бибилэтиэкэ, В.В.Никифоров–Күлүмнүүр аатынан “Тойон Мүрү” култуура киинэ “Ийэ тылга тирэҕирэн” диэн саха тылын күнүн ыытта.


Үөрүүлээх күҥҥэ “Умсулҕан” түмсүү коллекционердара Т.И. Алексеева саха тылыгар, алпаабытыгар аналлаах, М.С. Москвитина саха суруйааччыларын, олоҥхоһуттарын автографтаах кинигэлэрин муспутун туһунан быыстапкаларын дьон кэрэхсии көрдө. Кэнсиэр бырагырааматыгар “Мүрү долгуннара”, “Кэскил түһэ”, “Уһуктуу” түмсүүлэр, ону тэҥэ кииннэммит бибилэтиэкэ кэлэктиибэ хоһоон, литературнай монтаж аахтылар. “Умсулҕан” түмсүү коллекционердара ыллаан дьиэрэттилэр. Муусука нүөмэригэр А. Бечеканова, “Күндүүнэ” вокальнай ансаамбыл, Т. Винокурова, Е. Васильева ыллаатылар.

Саха тылын күнүгэр мустубут дьон норуодунай бэйиэт И.В. Мигалкин “Сахам тыла барахсан” хоһоонун сүһүөхтэригэр туран күргүөмүнэн аахтылар. Бүгүҥҥү үөрүүлээх күн В. Бубякина оһуокайынан түмүктэннэ.

Ааптар: Айаал МОЛОКОТИН

Добавить комментарий

Ваш e-mail не будет опубликован. Обязательные поля помечены *