Эдэр учууталлар сүлүөттэрэ ыытылынна

Олунньу 16-17 күннэригэр Сунтаар улууһугар эдэр учууталлар  түмсүүлэрин бастакы тэрээһинэ  үрдүк таһымнаахтык ааста.

edersaas.ru

«Сунтаар эдэр учууталларын ассоциацията” түмсүү 10 сыл анараа өттүгэр төрүттэммитэ. Бастакы бэрэссэдээтэлинэн Сунтаардааҕы политехническай лиссиэй-интэринээт английскай тылын учуутала Сардаана Никитина талыллыбыта. Онтон быйылгыттан саҥа састаап актыыба тэриллэн, иккис тыын ылан, 100-тэн тахса эдэр учууталы уонна иитээччини бииргэ түмэн, бэйэтин үлэтин улахан туһалаахтык саҕалаата.
Сүлүөт маҥнайгы күнэ Аллыҥа сэлиэнньэтигэр улахан тэрээһиннээхтик ыытылынна. Аллыҥа орто оскуолатын учууталлара уонна дириэктэр Владимир Уаров төһүү күүс буоланнар, тэрээһин үрдүк таһымнаахтык ааста. Бырагыраама быһыытынан, исписэлиистэр маҥнай 5 хамаандаҕа арахсан, бэйэ-бэйэлэрин кытары билсистилэр.
Салгыы оскуола спортивнай саалатыгар тэрээһин үөрүүлээх аһыллыыта буолла. Манна Сунтаар улууһун үөрэҕириитин салалтатын начаалынньыга Альберт Иванов кыттыыны ылла. Ону тэҥэ, Аллыҥа орто оскуолатын диэриэктэрэ Владимир Уаров, улуус үөрэҕириитин салалтатын исписэлииһэ уонна «СунАМП» тэрийсээччитэ Трофим Иванов үөрүүлээх күн үүммүтүнэн эҕэрдэлээтилэр. Ассоциация маҥнайгы састаабын чилиэннэрэ Надежда Тихонова уонна Клавдия Алексеева кинилэр саҕалаабыт хамсааһыннарын саҥалыы сайыннарбыттарыттан үөрэн туран, эдэрдэргэ бэйэлэрин өр сыллаах үөрүйэхтэрин үллэһиннилэр уонна “CунАМП” гимнын ыллаатылар. Ол бириэмэҕэ улуус уонна түмсүү былаахтара өрө тардылынна.

«Саамай дьоллоох күнүм үүннэ диэн этиэхпин баҕарабын. Тоҕо диэтэххэ, учуутал буолбут үлэм түмүгүн көрдүм диэххэ сөп. Төрүттээбит хамсааһыммыт сайдыбата диэммин санаарҕыыр этим. Онтон бу саҥа үлэлии кэлбит оҕолорбут, үөрэнээччилэрбит, биһиги иитэн таһаарбыт ыччаттарбыт номнуо учуутал буолан эргиллэн кэлэннэр биһиги үлэбитин сөргүттүлэр. Үрдүк таһымнаах сүлүөт буолла диэн сыаналыам этэ уонна биир идэлээхтэрбэр үрдүктэн үрдүк ситиһиилэри баҕарабын. «СунАМП” үлэтин сөргүтэн, бары кыттыһан үлэлииргитигэр баҕарабын» — диэн Надежда Тихонова санаатын үллэһиннэ.
Аллыҥа орто оскуолатыгар учууталлары бииргэ түмэр уонна интэриэһи бөҕөргөтөр араас трениннэр уонна күрэстэр ыытылыннылар. Салгыы сүлүөт кыттыылаахтарыгар «Хас биирдии оҕо ситиһиитэ” диэн флешмоб, араас тиэмэлэринэн хамаандаларга “төгүрүк остуол” ыытылынна. «Веселые старты» күрэхтэһии саха норуотун спортивнай оонньууларын көрүҥүнэн ыытылынна.

Аллыҥа сэлиэнньэтин кулуубугар сүлүөт маҥнайгы күнүн түмүктүүр кэнсиэр буолла. Эдэр исписэлиистэр оскуолаларынан уонна  хамаанданан мусукаалынай нүөмэрдэри туруордулар. Учууталлар талба талааннаахтарын дакаастаатылар: дууһаны долгутар ырыалар ылланнылар, араас үҥкүү уонна сценка  көрдөрдүлэр, сахалыы тыыннаах хоһоон аахтылар. Салгыы сүлүөт кыттыылаахтара Тойбохой сэлиэнньэтигэр айаннаатылар. Г.Н. Бессонов аатынан Тойбохойдооҕу историческай-кыраайы үөрэтэр комплекска «Түмэлгэ түмсүү» диэн билиини хаҥатар уонна бөҕөргөтөр квест-оонньуу тэрилиннэ. Ону тэҥэ кыттааччылар мусуой үлэһиттэрин кытта сирэй көрсөн олорон, туһалаах кэпсэтиини ыыттылар.
Сүлүөт иккис күнүгэр Тойбохой нэһилиэгин кулуубугар Сунтаар улууһун аҕа баһылыга Анатолий Григорьевтыын көрсүһүү буолла. Улуус үөрэҕириитин салалтатын начаалынньыга Альберт Иванов, Аллыҥа орто оскуолатын дириэктэрэ Владимир Уаров, Тойбохой орто оскуолатын дириэктэрэ Борис Васильев кэпсэтиигэ кыттыстылар. Эдэр исписэлиистэр үлэҕэ туох кыһалҕалаахтарын иһитиннэрдилэр уонна тирээн турар ыйытыктарын биэрдилэр. Ону тэҥэ улуус үөрэҕириитин сайыннарарга туох наадалааҕын, хайдах систиэмэ көдьүүстээх буолуон сөбүн кэпсэттилэр. Санааларын уонна бырайыактарын иһитиннэрдилэр.
Быйылгы эдэр учууталлар сүлүөттэрин өрөгөйдөөх сабыллыытыгар хамаандаларга анал бириистэри, хас биирдии кыттааччыга сэртипикээт уонна анал номинациялары туттардылар.
Кыттааччылар уонна тэрийээччилэр бары киэҥ өйдөөх-санаалаах, талба талааннаах, барытыгар көхтөөх, наһаа аһаҕас уонна олус сырдык ыралаах ыччаттар эбит. Онон, хас биирдиилэригэр тэтимнэрин ыһыктыбакка салгыы сайдан, үүнэн, үтүө-мааны ааттаах учуутал буолан тахсалларыгар баҕарабыт.

Дьулустаан ЕГОРОВ, “Саха сирэ”, edersaas сайтка анаан