Оленегорскайдар кирдээх убаҕаһы тиэйэр массыынаны туруорсаллар
Өрөспүүбүлүкэ бырабыыталыстыбата Аллайыахаҕа Дьүкээгир национальнай нэһилиэгэр отчуоттаата. Олунньу 21 күнүгэр Арктика миниистирэ Александр Саввинов салайааччылаах бөлөх Оленегорскай сэлиэнньэтигэр үлэлээтэ.
Нэһилиэк тэрилтэлэригэр сылдьан баран, олохтоохтору кытта көрүстүлэр. 2018 сыл түмүгүнэн судаарыстыбаннай былаас ситэриилээх уорганын үлэтин ыччакка уонна социальнай коммуникацияларга миниистири бастакы солбуйааччы Руслан Платонов отчуоттаата.
Оленегорскайдар бэйэлэрин сэлиэнньэлэрин сайдар суолларын интэриэһиргээтилэр. Чуолаан, мотуордары, оҥочолору атыылааһыны тэрийэргэ, итилэрэ суох оройуон киинигэр сатаан айаннаабаккын диэтилэр. Ону сэргэ кирдээх убаҕас ситимиттэн оботторор массыынаны туруорсаллар. Олохтоохтор ыйытыыларыгар миниистир Александр Саввинов, Ил Түмэн дьокутаата В.Черноградскай, Нэһилиэнньэ олоҕун хааччыйыыга госкэмитиэт бэрэссэдээтэлин солбуйааччы С.Самсонова, үөрэх уонна наука миниистирин солбуйааччы В.Тихонов, Уопсастыбаннай палаата чилиэнэ А.Марфусалова, улуус баһылыга Эдуард Слепцов хоруйдаатылар.
СИА.