Нам Бөтүҥэр “Эр санаа” уордьан кавалерын кэриэһигэр күрэхтэһии тэрийдилэр

Нам Бөтүҥэр “Эр санаа” уордьан кавалерын кэриэһигэр күрэхтэһии тэрийдилэр

Аҕа дойдуну көмүскээччилэр күннэрин көрсө Бөтүҥ нэһилиэгэр «Эр санаа» уордьан кавалера, бойобуой дьайыы бэтэрээнэ Максим Ильин аатын үйэтиттилэр. Кини кэриэһигэр 2002-2004 сыллаах төрүөх уолаттарга дойдуга бэриниилээх буолууга анаан иккис төгүлүн улуустааҕы күрэхтэһии тэрийэн ыыттылар.


Максим Климентьевич Ильин 1983 сыллаахха сэтинньи 11 күнүгэр Нам улууһун 2 Хомустаах нэһилиэгэр Зинаида Егоровна уонна Клим Семенович Ильиннэргэ үһүс оҕонон күн сирин көрбүт. 1989 сыл күһүнүгэр Таллан Бүрэ аатынан Бөтүҥ орто оскуолатын боруогун атыллаан билии аартыгар үктэммит. Кыра оҕо эрдэҕиттэн сүүрэн-көтөн, уонча сааһыттан үлэҕэ үөрэнэн, үлэһит, хорсун, сэмэй, тобуллаҕас буола улааппыт. Оскуолаҕа үөрэнэр кэмнэригэр волейболунан, баскетболунан, чэпчэки атлетиканан, тустуунан үлүһүйэн дьарыктаммыт, үҥкүү куруһуогар сылдьыбыт.

2001 сыллаахха ытык иэһин төлүү армияҕа ыҥырыллыбыт. Сулууспалыыр кэмигэр икки төгүл Чечня республикатыгар командировкаҕа сылдьыбыт. 2004 сыллаахха Чечняттан уочараттаах командировкаттан сулууспалыыр чааһыгар кэлэн баран, суол саахалыгар түбэһэн сырдык тыына быстыбыт.

Тэрээһиҥҥэ Бөтүҥ нэһилиэгин, Нам улууһун дьаһалталара, оскуола кэлэктиибэ, үөрэх управлениета, Максим төрөппүттэрэ, аймахтара, бииргэ үөрэммит доҕотторо кыттыыны ыллылар. Ыалдьыттарынан өрөспүүбүлүкэтээҕи «Память» общественнай тэрилтэ бэрэссэдээтэлэ, «Эр санаа» уордьан, «За военные заслуги» бэлиэ кавалера, Россиятааҕы спецназ бэтэрээнэ Иван Черкашин, байыаннай дьайыы бэтэрээнэ, Чечня сэриитин кыттыылааҕа, республикатааҕы буойуттар түмсүүлэрин чилиэнэ, «За отвагу» мэтээл кавалера Николай Чукров, Павел Оконешников салайааччылаах Нам улууһун байыаннай дьайыы бэтэрээннэрин «Буойун» түмсүү чилиэннэрэ буоллулар.

Күрэхтэһии үөрүүлээх аһыллыытыгар Иван Черкашин «Буойун» түмсүү чилиэннэригэр Станислав Гаврильевы уонна Гаврил Ноговицыны «За службу на Кавказе» өйдөбүнньүк мэтээлинэн наҕараадалаата. Бөтүҥ нэһилиэгин баһылыгар Михаил Макаровка «Союз родителей погибших военнослужащих» общественнай тэрилтэ аатыттан махтал сурук туттарда. Павел Оконешников оҕо спордун сайыннарыыга бииргэ үлэлэһэр түмсүүлэригэр, тэрилтэлэригэр, Максим төрөппүттэригэр махтал сурук туттартаата. Хас биирдии тыл эппит киһи кыттар уолаттарга ситиһиини, кыайыыны, дойдуга бэриниилээх, эйэлээх буолууну баҕардылар. Максим төрөппүттэрэ күрэхтэһиини тэрийсибит дьоҥҥо барҕа махтал тылларын эттилэр.
Күрэхтэһиигэ Хамаҕаттатааҕы саха-француз лицейэ, Көбөкөн, Бөтүҥ, Хатырык, Модут, Намнааҕы 1-кы №-дээх, Түбэ, Салбаҥ, Партизан оскуолаларыттан — барыта 17 уол кыттыыны ылла. Уолаттар «Үс төгүл икки» ыстаҥаҕа, пневматическай бинтиэпкэнэн сыал ытыыга, хапсаҕайга, «АК-47» аптамааты ыһыыга-таҥыыга, мас тардыһыытыгар күрэхтэстилэр. Биирдии көрүҥнэргэ үс бастыҥнарга түмүк таһааран: 1 миэстэҕэ 2 тыһ., 2 миэстэҕэ 1 тыһ. 500 солк. уонна 3 миэстэҕэ 1 тыһ. харчынан бирииһи олохтоотулар. Күрэхтэһии уопсай түмүгүнэн муҥутуур кыайыылааҕынан Түбэттэн Егор Лукин буолан ноутбугунан, 2 миэстэ — Слава Березкин (Бөтүҥ) сотовай телефонунан, 3 миэстэ — Саша Дорофеев планшетынан (Хатырык) наҕараадаланнылар. Росгвардия аатыттан Нам уонна Горнай улууһунааҕы сааны көҥүллүүр-лицензиялыыр үлэ отделениетыттан Олеся Слепцова инникигэ кэскиллээх спортсмеҥҥа — Колесов Антоҥҥа (Модут) анал бириис туттарда. Маны таһынан эдэр эрчимнээх кыттааччыга диэн Осипов Руслаҥҥа (Партизан) бириис анаатылар.
Кэлэр 2020 сылга, Максим Ильин аатын үйэтитэр үһүс төгүлүн ыытыллар күрэхтэһиини Максим төрөөбүт күнүгэр сэтинньи ыйга ыытары былааннаатылар.

Ааптар: Семен АРГУНОВ, Эҥсиэли хаһыат