Айсен Николаев Амма оройуонугар спорт эбийиэктэрин бэрэбиэркэлээтэ

Бары спорт эбийиэктэрэ Саха сирин норуоттарын VII спортивнай оонньууларын көрсө болдьоҕор киириэхтэрэ. Бу туһунан Саха сирин Ил Дархана Айсен Николаев Амма оройуонугар спорт инфраструктуратын көрүүтүн түмүгэр иһитиннэрдэ. Бэҕэһээ Амма сэлиэнньэтигэр кини оонньуулары Тэрийэр кэмитиэт мунньаҕын ыытта. 


Саха сирин баһылыга бэлиэтииринэн, бүгүн Аммаҕа 3000 миэстэлээх стадион уонна элбэх өҥөнү оҥорор спорт саалата толору бэлэмнэр. Чапчылҕан уонна Бөтүҥ сэлиэнньэлэригэр спорт саалаларын тутуу болдьоҕор түмүктэниэҕэ. Бу сайын күрэхтэһиилэр кыттааччылара түһүөхтээх Бөтүҥ орто оскуолатын тутар үлэ түмүктэнэрэ былааннанар. Тутууну ситэриигэ былырыын өрөспүүбүлүкэ баһылыгын сорудаҕынан үп көрүллүбүтэ.

Суол инфраструктуратын оҥорууга эмиэ үлэ ыытыллар. Оонньуулар саҕаланыахтарыгар диэри Аммаҕа, Чапчылҕаҥҥа уонна Бөтүҥҥэ уулуссалары уонна Амма-Бөтүҥ суолун учаастагын өрөмүөннүүр соруктаахтар. “Болдьох, биллэн турар, ыгым. Ол эрээри үп көрүллүбүтэ, билигин куонкурус ыытыллар. Оройуон уулуссатын-суолун тиһигэ Саха сирин норуоттарын спортивнай оонньуулара ыытылларынан сибээстээн өйөбүлү ылыаҕа диэн эрэнэбин”, — диэтэ Николаев.

Тэрийэр кэмитиэт мунньаҕар сибээһинэн тиһиктээхтик, хаачыстыбалаах аһылыгынан хааччыйыы, дьону түһэрии, куттал суох буолуутун тэрийии уо.д.а. туһунан кэпсэттилэр. Айсен Николаев былаас муниципальнай уонна федеральнай уорганнарын күүстэринэн бары боппуруостар болдьоҕор быһаарыллыахтара диэн эрэнэр.

Амма оройуонун олохтоохторо спорт бу күрэхтэһиитигэр бэлэмнэниигэ көхтөөхтүк кыттыахтаахтар уонна бэйэлэрин Олимпийскай оонньууларын курдук ылыныахтаахтар. Нэһилиэнньэ маннык дьаһанарга бэлэмнээҕин көрдүм: дьон сибэккилэри олордорго туруммут, субуотунньуктары ыыталлар, култуурунай бырагыраамаҕа кыттарга бэлэмнэнэллэр, үгүс урбаанньыттар бэйэлэрин спонсорскай өҥөлөрүн оҥорор соруктаахтар. Бу үөрүүлээх. Аммаҕа Саха сирин норуоттарын бастыҥ оонньуулара ыытыллыахтара диэн эрэнэбин”, — диэн бэлиэтээтэ өрөспүүбүлүкэ баһылыга.

Санатан эттэххэ, Саха сирин норуоттарын VII спортивнай оонньуулара Амма оройуонугар 2018 сылга ыытыллыахтаах этэ. Ол улахан халаантан 2019 сыл от ыйыгар көһөрүллүбүтэ.

Иван ЕВСЕЕВ

Анатолий Шестаков хаартыскаларга түһэриитэ

0
0

Добавить комментарий