Тиксии мааны эбэлэрэ иһирэх күнү бэлэхтээтилэр

Улуустааҕы библиотека ааҕар саалатыгар аҕам саастаах дьахталларга “Дьэ-эрэ, эбэлэр!” куонкурус буолан ааста. Далбар Хотуттар Альбина Комина, Зинаида Баланова, Татьяна Заровняева Лидия Тогуллахова олус истиҥник биэчэри бэлэхтээтилэр. Бу күн кинилэр бэйэлэрин талааннарын билиһиннэрдилэр уонна кэпсээтилэр.

---

Тиксии мааны дьонугар анаммыт тэрээһини ааҕар саала сэбиэдиссэйэ Людмила Корякина ыытта. Библиотека үлэһиттэрэ хомус тардан сиэри-туому толордулар.

Маҥнайгы түһүмэҕинэн өй оонньуута буолла. Иккис түһүмэххэ кыттааччылар сиэннэрин ким диэн атаахтатан, таптаан ааттыылларын иһитиннэрдилэр. Литературнай түһүмэххэ аҕам саастаах дьон остуоруйа ааптардарын, дьоруойдарын таайдылар. Маҥнайгы, үһүс түһүмэххэ Альбина Комина бастыҥ буолла. Төрдүс түһүмэххэ кыттааччылар бэйэлэрин талааннарын көрдөрөр сорук турда. Ким ыллаата, ким үҥкүүлээтэ, ким илиитинэн оҥорбут үлэлэрин, оҥоһуктарын көрөөччү дьүүлүгэр таһаарда. Зинаида Баланова чороон тутан сахалыы үҥкүүнү толордо, онтон Лидия Тогуллахова култуура эйгэтигэр үлэлиирин устата үөрэтээччи быһыытынан эдэр талааннары чочуйан таһаарбытын туһунан кылгастык кэпсээн билиһиннэрдэ. Бэһис түмүктүүр түһүмэххэ кыттааччылар сиэннэрин хайдах, ханнык ырыаны ыллаан утуталларын кэпсээтилэр. Россия үрдүнэн киэҥ биһирэбили ылбыт “Спокойной ночи, малыши” биэрии ырыата урукку да, билиҥҥи да сылларга ылламмытын, ылланарын бу да сырыыга көрдөрдүлэр.

Түөрт күн күбэй ийэ, эбэ күрэх бары түһүмэҕин олус көхтөөхтүк, бэһиэлэйдик уонна үөрүүлээхтик аастылар.

“Дьэ-эрэ, эбэлэр!” күрэх түмүгүнэн кыайыылаах үрдүк аатын аҕыйах ахсааннаах төрүт олохтоох хотугу норуотун үгэһин өрө тута сылдьар Татьяна Заровняева ылыан ылла.

Бары кыттааччылар Булуҥнааҕы култуура уонна духуобунас сайдыытын управлениета туруорбут сыаналаах бириистэринэн наҕараадаланнылар.

“Маннык хабааннаах тэрээһин сыл аайы буолар. “Дьэ-эрэ, эбэлэр!” күрэх аҕам саастаахтарга быйыл иккис сылын ыытыллар. Онтон бу иннинэ “Супер мама” диэн ааттаах тэрээһин эдэрчи саастаах ийэлэргэ ыытыллара. Эбэлэр, ийэлэр чугас дьонноруттан убаастабылы уонна махталы толору ылар бырааптаахтар. Онон бары кэрэ аҥаардарга чугас дьонноруттан таптал, болҕомто уурулларыгар баҕарабын”, – диэн Людмила Михайловна баҕа санаатын этэр.

Тэрээһин түмүктэниитэ ыалдьыттар астаах остуол тула олорон дуоһуйуохтарыгар диэри урукку ырыалары ыллаатылар. Биирдэ мустубучча, кэпсэтии үгэнигэр киирбиттэрин, толору сынньанан барбыттарын библиотека үлэһиттэрэ этэллэр.

Харысхан ПОПОВ

Ааптар хаартыскаҕа түһэриитэ