Бырабыыталыстыба отчуота: Эбии поликлиника наада

Кулун тутар 13 күнүгэр бырабыыталыстыба ааспыт сыллаах үлэтин отчуота киин куорат Губинскайдааҕы уонна Промышленнайдааҕы уокуруктарын олохтоохторун иннигэр туруорулунна.

edersaas.ru.

Сүрүн иһитиннэриини оҥорбут экономика миниистирэ Майя Данилова өрөспүүбүлүкэҕэ уонна Дьокуускай куоракка былырыын ыытыллыбыт үлэни-хамнаһы сырдатта, болҕомтону ордук социальнай эбийиэктэри уонна олорор дьиэни-уоту тутууга уурда. Ыйытыы кэмэ суох буолла. Ол курдук, олохтоохтор хаарбах дьиэттэн дьону көһөрүү бырагыраамата быйыл хайдах үлэлиэҕин тоһоҕолоон ыйыттылар, бөх реформатын, Өлүөнэ муостатын тутуутун интэриэһиргээтилэр, итирдэр утахтары атыылыыр сымыйа-кафелары уодьуганныырга эттилэр. Киирбит бары ыйытыыларга толору хоруй бэрилиннэ.

Этии да үгүс буолла. Дьону чуолаан доруобуйа харыстабылын боппуруостара долгутар эбиттэр. Поликлиникаларга чопчу исписэлиистэр тиийбэттэрэ, 202-с уонна 203-с микрооройуоннарга медицина өҥөтүн тииһилэҥэ мөлтөҕө, онон эбии поликлиниканы тутар наадата этилиннэ.

Губинскай уокурук олохтооҕо Наталия Стусь Арассыыйа федеральнай нолуогабай сулууспатын Оройуоннар икки ардыларынааҕы 5-с №-дээх иниспиэксийэтин 202-с микрооройуонтан көһөрөргө туруоруста. Онуоха чугастааҕы сылларга нолуок сулууспатын иниспиэксийэтигэр саҥа дьиэни тутар былааннанара, билигин бырайыак-симиэтэ докумуона оҥоһулла сылдьара быһаарылынна. Куорат баһылыгын экэниэмикэҕэ уонна үпкэ солбуйааччы Михаил Воробьев бу эбийиэк тутуутугар Дзержинскэй уулуссатыгар сир учаастага быһыллыбытын кэпсээтэ.

Бэтэрээннэр хамсааһыннарын актыыбыстара куорат уокуруктарыгар биэнсийэлээхтэргэ уонна сааһырбыт дьоҥҥо анаан үһүс көлүөнэ оскуолаларын арыйарга эттилэр. Инбэлииттэр Бүтүн Арассыыйатааҕы уопсастыбаларын Дьокуускайдааҕы салаатын бэрэссэдээтэлэ Екатерина Емелина куорат спортивнай саалаларыгар инбэлииттэр спорт адаптивнай көрүҥнэринэн дьарыктаныыларын тэрийэр туһунан боппуруоһу көрөргө көрдөстө. Түмүккэ мунньах кыттыылаахтара ситэриилээх былаас ааспыт сылаах үлэтин биһирииллэрин биллэрдилэр. Ситиһиилэри баҕардылар.

Раиса Сибирякова, «Саха сирэ» edersaas.ru

0
0

Добавить комментарий

Ваш e-mail не будет опубликован. Обязательные поля помечены *