Дзамболат Тедеев: «Арассыыйа сүүмэрдэммит хамаандата ханнык баҕар дойду хамаандатын кытта күрэхтэһэргэ бэлэм»

Бүгүн Дьокуускайга өрөспүүбүлүкэтээҕи медиа-кииҥҥэ буолаары турар көҥүл тустууга Аан дойду кубогын пресс-кэмпириэнсийэтэ буолла. Манна СӨ спордун миниистирэ Иннокентий Григорьев, тустуу аан дойдутааҕы түмсүүтүн бюротун чилиэнэ Родика Мария Якши, судьуйалар хамыыһыйаларын бэрэсидьиэнэ Сильвестри Антонио, Арассыыйа сүүмэрдэммит хамаандатын сүрүн тириэньэрэ Дзамболат Тедеев, Болгария олимпийскай комитетын генеральнай сэкирэтээрэ Бельчо Горанов, АХШ тустууга национальнай федерациятын генеральнай сэкирэтээрэ Ричард Бендер кыттыыны ыллылар.

СӨ спордун миниистирэ Иннокентий Григорьев кубок мэтээллэрин суруналыыстарга көрдөрдө уонна: «Мэтээллэр национальнай истииллээх буоллулар — чороон быһыылаахтар. Мэтээлгэ эһэлэр туста сылдьаллар, бу күүһү, элэккэй майгыны, Арассыыйаны уонна Саха сирин бэлиэтиир. Дизайнын спорт национальнай көрүҥнэрин өрөспүүбүлүкэтээҕи киинин дизайнера Диана Баишева оҥордо», — диэн билиһиннэрдэ.

Дзамболат Тедеев

Көҥүл тустууга Арассыыйа сүүмэрдэммит хамаандатын сүрүн тириэньэрэ Дзамболат Тедеев: «Биһиги күрэхтэһэ кэлбит дойду бэрэстэбиитэллэрэ бары биир усулуобуйалаах буоллалларыгар, кубок үрдүк таһымнаахтык ыытылларыгар диэн соругу туруоруммуппут. Дойду тустууга федерациятын бэрэсидьиэнэ Михаил Мамиашвили баай историялаах, биллэр тустуу оскуолалаах, Виктор Лебедев, бырааттыы Контоевтар, Павел Пинигин, Роман Дмитриев о.д.а. курдук спортсменнардаах өрөспүүбүлүкэҕэ Аан дойду кубога ыытылларын өйөөбүтүн иһин махтанабыт. Чаҕылхай киирсиилэр буолуохтара диэн күүтэбит. Арассыыйа сүүмэрдэммит хамаандата ханнык баҕар дойду хамаандатын кытта күрэхтэһэргэ бэлэм, барыларыгар убаастабыллаахтык сыһыаннаһабыт. Тустууктар көбүөргэ эрэ утарсыһааччыларбыт, көбүөр таһыгар — доҕордууларбыт,» — диир.

Салгыы ыалдьыттар суруналыыстар ыйытыктарыгар хоруйдаатылар. «Спорт Якутии» таһаарыы эрэдээктэрэ Александр Посельскай  Дзамболат Тедеевтан «Арассыыйа хамаандатын састаабыгар сүүрбэ тустуук баар. Ханнык киирсиигэ хайа тустуук күрэхтэһэрин хайдах быһаараҕыт?» диэн ыйытта. Онуоха Дзамболат Ильич: «Ханнык дойду хамаандатын кытта күрэхтэһэрбититтэн ким тустарын тириэньэрдэр сүбэлэһэн баран быһаарыахпыт. Эдэр тустууктарга бэйэлэрин көрдөрөллөрүгэр кыах биэриэхпит, тустуохтара. Саха ыалдьааччылара Виктор Рассадин уонна Арыйаан Тютрин көбүөргэ тахсалларын күүтэллэрин билэбин. Кинилэри ханна наада диэбиппитинэн күрэхтэһиннэриэхпит. Бу биһиэхэ эмиэ суолталаах боппуруос, Виктордаах Арыйаан бу туһуттан сыра бөҕөтүн уурбуттара, бэлэмнэммиттэрэ», — диэн эппиэттээтэ.

Маны таһынан, «Якутия» хаһыат эрэдээктэрэ Федор Григорьев «Олимпиада иннинээҕэ хомууру Дьокуускайга ыытар, манна кэлэн дьарыктанар кыах баар дуо?» диэн ыйытта. Онуоха сүрүн тириэньэр: «Саха сирин бэрэсидьиэнэ Айсен Николаев уонна Виктор Лебедев ыҥырдахтарына кэлэн бөҕө буоллаҕа,» — диэн хоруйдаата.

Санатан суруйдахха, кулун тутар 16-17 күннэригэр Дьокуускайга «Триумф» спорт киинигэр көҥүл тустууга Аан дойду кубога ыытыллыаҕа. Манна: Арассыыйа, АХШ, Грузия, Куба, Япония, Иран, Турция уонна Монголия хамаандалара кыттыахтара.

Айтана Аммосова, edersaas.ru

 

 

0
0

Добавить комментарий