Үөһээ Бүлүүгэ сылгыһыттар күрэхтэрэ буолла. Маҥнайгы миэстэлээх хамаанда «Буран» ылла

Үөһээ Бүлүүгэ сылгыһыттар күрэхтэрэ буолла. Маҥнайгы миэстэлээх хамаанда «Буран» ылла

Өрөспүүбүлүкэҕэ кулун тутар 21 күнэ сылгыһыттар күннэрэ. Быйыл кулун тутар 21-22 күннэригэр Үөһээ Бүлүүгэ өрөспүүбүлүкэтээҕи сылгыһыттар күрэхтэрэ буолуоҕа.


Бүгүн Үөһээ Бүлүүгэ улахан таһымнаах сылгыһыттар күрэхтэһиилэригэр улуус аатыттан кыттыахтаах хамаандалары быһаарар аналлаах күрэхтэһии ыытылынна. Сарсыарда 10 чаастан Төҥүргэстээх диэн сиргэ күрэхтэһээччилэр, ыалдьааччылар, көрөөччүлэр тоҕуоруһа муһуннулар. Кэнтик, Ороһу, Дүллүкү, Тамалакаан, Үөдүгэй, Нам, Балаҕаннаах, Оҥхой нэһилиэктэриттэн түөртүү киһилээх аҕыс хамаанда кытынна.

Илин-кэлин былдьаһыы түөрт түһүмэҕинэн ыытылынна. Ол курдук, бастакы түһүмэххэ, кыттааччылар ат ыҥыырын сүгэн баран, 100 м сүүрэллэр. Иккис түһүмэххэ, иккис кыттааччы аты тутар, сүүрэн кэлбит маҥнайгы кыттааччы аты ыҥыырдыыр. Ыҥыырданыллыбытын кэнниттэн иккис кыттааччы аты миинэн баран, 600 м сүүрдэр. Онно биэс тоһоҕо маһы икки ардыларынан эрийэ-буруйа сүүрэн ааһыахтаах. 300 м ааһан баран, кыттааччы атыттан түһэн, бэрэмэдэйи атыгар уурар уонна салгыы барар. Үһүс түһүмэххэ бэтэрээн сылгыһыт аты тутар кэмигэр иккис кыттааччы атыттан түһэн, ыҥыыры, бэрэмэдэйи устан сыарҕаҕа уурар уонна аты сыарҕаҕа көлүйэр. Салгыы аты тутан кыттааччы сыарҕаҕа олорон 300 м барар. Төрдүс түһүмэххэ төрдүс кыттааччы аты тутан турар кэмигэр үһүс кыттааччы сыарҕаны төлөрүтэр уонна ыҥыырдыыр. Салгыы төрдүс кыттааччы акка олорон баран 700 м сүүрдэр. Ол баран иһэн, 10 киилэ ыйааһыннаах уотурбаны илиитинэн ылан ааһан, салгыы биэтэккэ кэлэн ол куулун уһаакка угуохтаах. 8 хамаанда эр бэртэрэ итинник түөрт түһүмэххэ тура тэбинэн тура, ис сүрэхтэриттэн ылсан куоталастылар.

Дьэ эрийсиилээх күрэхтэһии түмүгүнэн бастакы миэстэни Тамалакаан, иккиһи Кэнтик, үсүһү Оҥхой хамаандалара ылан үөрдүлэр-көттүлэр. Үөрэллэрэ саамай сөп. Бириистэрэ үчүгэйэ бэрт. Бастакы миэстэлээхтэр «Буранынан», иккистэр дьоҕус «Буранынан» (мотособака), үһүстэр ат ыҥыырынан наҕараадаланнылар. Бириистэри улуус дьаһалтата туруорда.

Тамалакаан нэһилиэгин баһылыга Петр Иванов: «Бэрт күрэхтэһии буолла. Дьонум бастаабыттара олус бэрт. Эрдэттэн сылгыһыттары кытта сөбүлэһэн бэлэмнэммиппит. Бириистэрэ да мургун. Аны биир нэдиэлэ курдугунан Үөһээ Бүлүүгэ буолуохтаах өрөспүүбүлүкэтээҕи күрэхтэһиигэ Тамалакаан уонна иккиһи ылбыт Кэнтик хамаандалара кыттыахтара. Онно бэлэмнэнии улуус киинигэр буолар диэн быһаардылар. Хамаандам дьонугар ис сүрэхтэн эҕэрдэбин тиэрдэбин «, — диэн санаатын үллэһиннэ.

Дьэ онон аны биир нэдиэлэнэн кулун тутар 21-22 күннэригэр Үөһээ Бүлүү сиригэр-уотугар өрөспүүбүлүкэтээҕи сылгыһыттар күннэригэр аналлаах тэрээһиҥҥэ бар дьоммутун күүтэбит. Сүрүн бириис «Беларусь» тыраахтар.

Ааптар: «Үөһээ Бүлүү» хаһыат.

Добавить комментарий

Ваш e-mail не будет опубликован. Обязательные поля помечены *