Дьокуускайга ДСК оройуонугар “ЕМЕЯН” диэн ааттаах киинэ тыйаатыра аһыллан үлэлээн эрэр. “ЕМЕЯН”” өрөспүүүлүкэ киин куоратыгар бэһис тыйаатырынан буолла.
edersaas.ru
Тыйаатыр кулун тутар 7 күнүгэр үөрүүлээх быһыыга-майгыга аһыллыбыта. Манна эбийиэги тутууга үбүнэн-харчынан көмөлөспүт “Алмаскредитсервис” бэрэстэбиитэлэ Анна Новгородова, “ЕМЕЯН” эргиэн-сынньатар комплекс дириэктэрэ Дмитрий Федотов уонна, биллэн турар, тыйаатыр хаһаайына Ян Емельянов кытыннылар.
«Биһиги тыйаатырбыт ДСК эрэ буолбакка, куорат бары олохтоохторугар интэриэһинэй буолуоҕа. Кинилэр табыгастаахтык, астынан сынньаналларыгар сөптөөх усулуобуйаны оҥоро сатаатыбыт. Тыйаатырга аан дойду, Арассыыйа уонна Саха сирин саҥа тахсыбыт киинэлэрэ көстүөхтэрэ. Сыанабыт ыарахана суох, репертуарбыт киэҥ буолуо. Араас аахсыйалары, дьаһаллары тыйаатыр концепциятыгар эппиэттиир курдук ыытарга былааннанабыт”, — диэн тыйаатыр хаһаайына Ян Емельянов иһитиннэрдэ.
“ЕМЕЯН” Эргиэн-сынньанар комплексы “Синема Центр” тыйаатыры арыйан үлэлэппит Дмитрий Федотов салайар. Кини эппитинэн, маннык стилизованнай саалалардаах тыйаатыр Арассыыйаҕа өссө суох. “Биһиги болҕомтобутун, бастатан туран, супер-дьоруойдар тустарынан комикстарынан көрөн улааппыт ыччаттарга туһаайдыбыт”, — диэн инникитин прокакка тахсар киинэлэри барытын көрдөрөр улахан тыйаатырданыахтарын баҕаралларын туһунан баҕа санаатын үллэһиннэ.
Ян Емельянов аҕата Владимир Петрович тыйаатыр көрөөччүлэргэ аанын тэлэччи аһыар диэри күнүстэри-түүннэри ыытыллыбыт үлэлэргэ элбэх биригээдэ, биирдиилээн дьон көмөлөспүттэригэр махтанна. Тутууга үлэлээбит уопуттаах Владимир Петрович уола Ян Емельяновы үлэ түмүгүн бырааһынньыгынан эҕэрдэлээтэ.
Сунтаартан төрүттээх аҕалаах-уолу эҕэрдэлии кэлбит Сунтаар улууһун баһылыгын солбуйааччы Николай Александров тыйаатыр аһыллыыта үүнэр көлүөнэ сайдарыгар бигэ тирэх буоларыгар эрэнэрин биллэрдэ.
Кэлбит ыалдьыттарга тыйаатыр иккис этээһигэр баар саалаларга киинэлэртэн быһа тардан көрдөрдүлэр. Онтон үөрүүлээх түгэн умнуллубат тордунан күндүлээтилэр.
ххх
Авдорожная 42 А аадырыска ыраахтан дьэндэйэн көстөр тыйаатыр үс саалата супер-дьоруойдар стиллэринэн оҥоһуллубут. “Супермен” уонна “Человек-паук” (“Спайдермен”) саалалар 124, онтон “Капитан Америка” тупсаҕай саала 34 миэстэлээх. Икки улахан саалаҕа доруобуйаларынан хааччахтаах дьоҥҥо анаан, икки кэлээскэни уурар сир уонна подьемниктар оҥоһуллубуттар.
Көрөөччүлэргэ анаан “Братья Грилль”, “Хот Доггер”, “Каре” паназиатскай куукуната үлэлиэхтэрэ. Ону сэргэ “Планета Кидс” салаата аһыллыаҕа.
“Киинэ эйгэтигэр сыстыахпын оҕо эрдэхпиттэн баҕарарым”
Ян Емельянов: “Киинэ эйгэтэ миигин кыра эрдэхпит умсугуппута, бу эйгэҕэ туох эмэ сыһыаннаах буолуохпун олус баҕарарым. Ол баҕам туолан, тыйаатыр арыйар кыах үөскээтэ. Үгүстэр аатын муодарҕыыллар. Быһаарыыта судургу – Емельянов Ян диэн ааппын сүһүөхтэринэн кылгаттым. Саалаларбытыгар иҥэрбит супер-дьоруойдарбыт биһирэмнээхтэр – төрөөбүт куораттарын уонна бар дьоннорун көмүскэлигэр сылдьар дьоруойдар.
Дьиҥэр, тыйаатыр бырайыага олус уустук, араас мэһэйдэри, ыарахаттары көрүстүбүт. Ол гынан баран, ылсыбыт дьыалаларыгар бэриниилээх, тиһэҕэр тириэрдэргэ дьулуһар биир ньыгыл хамаандалаах буолан, көхтөөхтүк үлэлээтибит, кыайдыбыт дии саныыбын”.
Надежда ЕГОРОВА, “Саха сирэ”, edersaas.ru