Нам улууһугар тыа хаһаайыстыбатын балаһыанньата уустук

Нам улууһугар тыа хаһаайыстыбатын балаһыанньата уустук

Тохсунньу 1 күнүнээҕи туругунан, Нам улууһугар ынах сүөһү ахсаана 10174 төбөҕө тиийдэ. 2017 сыллааҕар 535 төбөнөн аҕыйаата. Бааһынай хаһаайыстыбаларга ынах сүөһү 3096, кэтэх хаһаайыстыбалаахтарга 6875 төбө хаалла. 2017 сылы кытта тэґнээтэххэ бааһынай хаһаайыстыбаларга 49 төбөнөн, ЛПХ 390 төбөнөн сүөһүлэрин ахсаана аҕыйаабыт.


Сүөһү ахсаана Нам улууһун биэс эрэ нэһилиэгэр дуона суох эбилиннэ (Арбыҥҥа 2, Бөтүҥҥэ 17, Фрунзеҕа 7, Хатырыкка 8, 1 Хомустаахха 28 төбө). Ордук элбэх сүөһү көҕүрээһинэ Үөдэйгэ — 46, Ленскэйгэ — 127, Салбаҥҥа — 65, Таастаахха — 37 таҕыста.

Ыанар ынах улуус үрдүнэн 214 төбөнөн 2017 сыллааҕар аҕыйаата, эбэтэр тохсунньуга 3681 ынаҕы тутан хааллыбыт. Ыанар ынаҕы Бөтүґнэр 8 төбөнөн, Фрунзелар 3 төбөнөн, Хатырыктар 8 төбөнөн, 1 Хомустаахтар 15 төбөнөн эптилэр. Мантан атын нэһилиэктэргэ ыанар ынахтара көҕүрээтэ. Саамай элбэх көҕүрээһин Ленскэй (17), Салбаґ (22), Түбэ (27 төбө) нэһилиэктэригэр таһаарылынна.

Улуус үрдүнэн сылгы ахсаана 11957 төбөҕө тиийдэ. Ол эбэтэр 2017 сыллааҕар 383 төбөнөн аччаата. Сылгы Бөтүґґэ, Көбөкөҥҥө, Модукка, Фрунзеҕа, Хамаҕаттаҕа, Хатыҥ Арыыга, 2 Хомустаахха, Маймаҕаҕа эрэ кыратык эбилиннэ.

Көтөр ахсаана улууска 1208 (+170), сибиинньэ 465 (+109), коза 56 (-5), кролик 304 (+28) төбөҕө тиийдэ.

Үүтү валовай ыаһын 2017 сыллааҕар 1009 центнеринэн аччаан 76466 центнергэ тириэрдиллибит. Көтөр, сүөһү этин оҥоруу (тыыннаах ыйааһынынан) 18572 центнергэ тиийбит, 2017 сыллааҕар 618 ц ордук эт оҥоһуллубут.

Сүөһү, сылгы ахсаана аччааһынын сүрүн төрүөтүнэн кэтэх хаһаайыстыбалаах сааһырбыт дьон хаһаайыстыбаларын эһэн эрэллэрэ, эдэр дьон сүөһүнү иитиигэ оччо дьулуспаттара, сүөһү тутуон, иитиэн, сүөһүлэрин ахсаанын эбиэн баҕарар дьоґґо оттуур сирдэрэ тиийбэтэ, сүөһү үчүгэй хаачыстыбалаах, иҥэмтиэлээх аһылыгынан (от, сиилэс, сенаж, комбикорм, фураж) толору хааччыллыбата, сүөһүнү мөлтөхтүк көрүү-истии, ходуһалар, мэччирэҥнэр өртөммөттөрө, буоһатыы, искусственнай сиэмэлээһин мөлтөхтүк тэриллэрэ, үүт, эт тутуллар сыаната, субсидията кыра буолан дьону хаһаайыстыба тэринэргэ, хаһаайыстыбаны тэнитиигэ көҕүлээбэтэ уо.д.а. буолаллар. Сүөһүттэн ылыллар бородууксуйа улааппат сүрүн төрүөтүнэн племенной үлэ мөлтөхтүк ыытыллара, сүөһү боруодата мөлтөҕө, сөптөөх аһатыы, көрүү-истии суоҕа буолар.

Ветеринарнай управление үлэһиттэрэ учуоттуулларынан, улуус үрдүнэн 2019 сыл тохсунньу 1 күнүгэр 4049 төбө ийэ сүөһү баар. Ол иһиттэн ынаҕа 3497 төбө, туҥуй бургунаһа 552 төбө. Балартан олунньу 27 күнүнээҕи туругунан 632 төрөөбүт. Итинтэн ынаҕа 575, бургунаһа 57. Төрүөҕү ылыы былырыыҥҥытааҕар бытаарбыт. Былырыын дьыл баччатыгар 874 ньирэйдэммит эбиппит. Ветеринардар быйыл 3239 ньирэй төрүө диэн ааҕа сылдьаллар. Балартан сыл бастакы кварталыгар 1214, иккис кварталга 1822 ньирэй төрүөхтээх. Бу сабаҕалааһын чуолкай буоллаҕына быйыл кытарааһын элбэҕинэн улуус үрдүнэн үүтү ыаһын, эти оҥоруу лаппа аччыыр, сүөһү төбөтө биллэрдик аҕыйыыр чинчилэммит.

Ааптар: Иннокентий Иванов

Добавить комментарий

Ваш e-mail не будет опубликован. Обязательные поля помечены *