Сунтаартан Дьокуускайга диэри чэпчэки сыаналаах оптуобус сылдьар

Тимур Иванов салайааччылаах Сунтаардааҕы “Автотранспортнай предприятие” МУП бэрт сэргэхтик үлэлиир. Былырыыҥҥыттан Сунтаар – Дьокуускай – Сунтаар хайысхатынан ПАЗ оптуобуһунан удамыр сыанаҕа дьону таһаллар.

edersaas.ru

Олохтоохтор улуус дьаһалтата чэпчэки сыаналаах оптуобуһу сырытыннарар буолбуттарын хайгыыллар. Буолумуна, чааһынай таксистар Сунтаартан Дьокуускайга диэри 5000 солкуобайга илдьэллэр. Оттон “АТП”-лар бырайыастара 2500 солкуобайын таһынан, өссө араас чэпчэтиилэр бааллар.

Билигин 24-түү миэстэлээх икки ПАЗ оптуобус куоракка сылдьар.

Тимур Иванов салайааччынан ананыаҕыттан «АТП» МУП үлэтэ сэргэхсийдэ диэн олохтоохтор этэллэр.

Сунтаартан өрөспүүбүлүкэ киинигэр диэри 900 килэмиэтиртэн тахса. Сайыҥҥы өттүгэр Бүлүү өрүһү хаста даҕаны нөҥүөлээн тиийэллэр. Кыһыҥҥы өттүгэр айан-сырыы тэтимирэр. Уонтан тахса чааһынан куоракка тиийэллэр.   “Ахсынньы ыйтан саҕалаан куоракка сылдьабыт. Уопсайа 20-тэн тахса рейс оҥоһулунна. Саас суол сабылыннаҕына  оптуобустар Сунтаар – Сиэйэ – Сунтаар, Сунтаар – Куокуну – Сунтаар хайысхатынан сылдьыахтара. Сайын өссө икки “Газель” оптуобуһу аҕаллахпытына Сунтаар – Дьокуускай маршрутунан сырытыннарыахпыт”, — диэн инники былааннарын кытары салайааччы Тимур Иванов үллэһиннэ.

Суруналыыс Мария Кобельянова кэпсээбитинэн, тэрилтэ араас чэпчэтиилээх аахсыйалары ыытар эбит. Ол курдук, панкратионунан дьарыктанар спортсменнары өйөөн, күрэхтэһиилэргэ буор-босхо таһаллар, өссө истипиэндьийэ олохтууллар. Куоракка ыытыллар тэрээһиннэргэ “АТП” МУП куруук күүс-көмө буоларын бэлиэтээтэ.

Дьокуускай хайысхатынан айанныыр уопуттаах суоппар.

 

Аныгы, кондиционердах  оптуобустар кыһыннары-сайыннары дьону куоракка удамыр сыанаҕа таһыахтара.

 

Анивера Акимова, edersaas.ru

1
0

Добавить комментарий

Ваш e-mail не будет опубликован. Обязательные поля помечены *