Аммалар спартакиадаларыгар хайыһардаан дайдылар, хаҥкылаан элээрдилэр

Аммалар спартакиадаларыгар хайыһардаан дайдылар, хаҥкылаан элээрдилэр

Аммалар кыһыҥҥы спорт көрүҥнэрин нэһилиэгинэн өрө туталлар. Быйылгы биир кэлим Спартакиада талааннаах тренер Леонид Ноевка ананна.


Амма улууһа Саха сирин норуоттарын 7 -с спортивнай Оонньууларын ылыаҕыттан спорт бары көрүҥнэринэн дьарыктаныыны күүскэ тэрийэр. Ол чэрчитинэн сыллата нэһилиэктэр икки ардыларыгар ыытыллар комплекснай спартакиадаҕа спорт кыһыҥҥы көрүҥнэрин киллэрэн, быйыл иккис төгүлүн тэрилиннэа.

Ааспыт сылга спартакиада Амма нэһилиэгэр буолбут эбит буоллаҕына, бу сырыыга Соморсун нэһилиэгэр түмүстүлэр. Ол тоҕоостоох. «Биһиги нэһилиэк икки сыл буола-буола талааннаах тренер, элбэх киһини хайыһар да, спорт атын да көрүҥнэригэр уһуйбут Леонид Романович Ноев сырдык аатын бирииһигэр хайыһарга аһаҕас күрэхтэһии ыытабыт. Онон быйылгы спартакиаданы манна ыытарга этии киллэрбиппит«, — диэн этэр Соморсун нэһилиэгин баһылыга Алексей Кононов. Бэлиэтээн эттэххэ, Алексей Юрьевич 2017 сылга «Бастыҥ спортивнай баһылык» аатын ылан турар.

Спартакиада уопсайа спорт 6 көрүҥэр ыытылынна. Хайыһар күрэҕэ, биатлон, эстафета, хайаттан хайыһарынан түһүү, шорт-трек уонна спортивнай ориентирование. Күрэхтэһиигэ уопсайа 14 нэһилиэктэн 10 нэһилиэк кыттан, киирсии тыҥааһыннаах буолла.

Кылаабынай судьуйанан спорт управлениетын кылаабынай исписэлииһэ Гаврил Максимов үлэлээтэ. «Маннык кыһыҥҥы спартакиада иккис төгүлүн ыытыллар. Ону сэргэ тренер Леонид Романович Ноев кэриэһигэр улуустааҕы хайыһар күрэҕэ ыытылынна. Үөрэрбит диэн ааспыт сыллааҕар кыттааччыта быдан элбэх. Холобура былырыын шорт трек, хайаттан түһүү курдук күрэхтэргэ 3-4 эрэ нэһилиэк эбит буоллаҕына, быйыл 9 нэһилиэк бэрэстэбиитэлэ баар . Ону сэргэ таһымнара быдан үрдээбит. Онон салгыы бу көрүҥнэрбитин сайыннарыахпыт. Билигин биир киһи икки көрүҥҥэ кыттыан сөп. Кэлэр өртүгэр биир киһи биир эрэ көрүҥҥэ кыттар балаһыанньата баар буолуо. Оччотугар кыттааччы өссө элбээн, нэһилиэнньэ спордунан дьарыктаныыта улаатыа. Быйылгы күрэхтэһиигэ сорох нэһилиэктэр толору састааба да суох буоллаллар, атын кыттыбатах нэһилиэктэртэн кыайыылаах тахсаллар«, — диэн этэр Гаврил Дмитриевич.

Бу курдук сааскы чэбдик салгыҥҥа аммалар хайыһардаан дайдылар, хаҥкылаан элээрдилэр. Спартакиада ыытыллар кэмигэр зачету таһынан бэтэрээннэр эмиэ 1000 миэтэрэҕэ сүүрдүлэр. Соморсун нэһилиэгин көхтөөх олохтоохторо кэргэннии Антонина уонна Николай Степановтар иккиэн кытыннылар, атыттарга холобур буоллулар.

Сиһилии «Амма олоҕо» хаһыакка ааҕаарыҥ.

Ааптар: Наталья Бубякина.

Добавить комментарий

Ваш e-mail не будет опубликован. Обязательные поля помечены *