«Хаҥалас-Аска» усуйааналар, кэбээйилэр эбии балык туттардылар

«Хаҥалас-Аска» усуйааналар, кэбээйилэр эбии балык туттардылар

Үөдэй сэлиэнньэтигэр дьон-сэргэ үлэлээх буолуутугар сөптөөх суол тэриллэр. Мохсоҕоллоохтооҕу «Хаҥалас-Ас» тыа хаһаайыстыбатын производственнай кээпэрэтиибин иһинэн үлэлиир эти, балыгы уонна сир аһын оҥорон таһаарар сыах сылы эргиччи үлэлиир кыахха киирбит.


Аҕыйах сыллааҕыта сыалыһар балыгы тутууну Хаҥалас улууһун соҕуруу нэһилиэктэриттэн саҕалаабыттара. Манна сыах маастарынан Т.Д. Филиппова үлэлиир, кини көмөлөһөөччүлэринэн Д.Г. Филиппова уонна Г.Н. Колесова буолаллар. Дуогабарынан эт эрбээччинэн В.Н. Герасимов, сууйар-сотор үлэҕэ Н.К. Филиппова сыралаһан сылдьаллар. Маны сэргэ Үөдэй бастыҥ асчыт эбэлэрин икки биригээдэтэ көмөҕө күн аайы үстүү киһини ыыталлар.

— Быйылгы сылга үлэбит элбэх. Былырыын сыах нөҥүө үс туонна балык астаммыта. Сыалыһартан кэтилиэт, стейк диэн астары уонна быарын бүтэйдии салапааҥҥа кутан оҥорон таһаарабыт. Үлэлиир сыахпыт кыараҕас, онон кэҥиирбит буоллар абыраныа этибит. Салайааччыларбыт туспа хочуолунай тутар былааннаахтар, — диир сыах маастара Татьяна Дмитриевна.

Бородууксуйалара хамаҕатык олохтоох нэһилиэнньэҕэ уонна улуус, киин куорат олохтоохторугар атыыга барар. Быйылгы сылга Усуйаана улууһуттан — 1132,72 кг, Кэбээйиттэн — 1 769,9 кг уонна Хаҥалас улууһуттан — 2 410,46 кг балыгы туттарбыттар, (о.и. Үөдэйтэн — 1300, Кытыл Дьураттан — 300 кг) онон, уопсайынан, — 5 313,1 кг сыалыһар балыгы, киилэтин 90 солкуобай тутан, астыы сылдьаллар.

Сыалыһартан тугун да хаалларбакка туһаҕа таһаарар үлэ барар. Тобоҕун, тириитин уҥуохтарын үлтү сыстаран саһыл иитэр фермаҕа анаан эбии аһылык бэлэмнииллэр.

Үтүө үлэһиттэрдээх, бастыҥ асчыттардаах Үөдэй дьоно иитэр сүөһүлэрин, бултуур балыктарын, айылҕа сирин аһын хомуйан миэстэтигэр туттаран дохуот ылаллар, үлэ миэстэтин таһаараллар. Күннээҕи түбүктээх үлэ, дьаныар — өрөспүүбүлүкэни уонна олохпутун сайыннарарын умнубат курдук сорук күннэтэ турар. Сүрүннээһин, ааҕынан-суоттанан үлэлээһин баар буоллаҕына, оҥорон таһаарар бородууксуйа улаатара эрэбил.

Уйбаан УЙГУУРАП,
ааптар хаартыскаҕа түһэриитэ.

Добавить комментарий