2020 сылга атырдьах ыйын бүтүүтэ «Азия оҕолоро» норуоттар икки ардыларынааҕы сайыҥҥы оонньуулар Монголия Өрөспүүбүлүкэтин Улан-Батор куоратыгар ыытыллыахтара.
edersaas.ru
Бу күннэргэ «Саха» НКИХ салайааччыта Олег Марков Монголияҕа тиийэн, «MNB» национальнай тэлэбиидэнньэ салалтатын кытта көрсөн, бииргэ үлэлээһин боппуруостарын дьүүллэһэн, быһаарсан кэллэ.
Олег Марков Монголияҕа сырыытын туһунан бу курдук кэпсээтэ:
— Быйыл Соҕуруу Сахалиҥҥа ыытыллыбыт «Азия оҕолоро» Кыһыҥҥы оонньууларга Монголия Өрөспүүбүлүкэтин национальнай тэлэбиидэнньэтин салайааччыларын кытта көрсөн кэпсэппитим. Онно миэстэтигэр сылдьан, монгол табаарыстарбыт биһиги үлэлиир тиэхиниьикэбитин, хайысхабытын кытта билсибиттэрэ, үөрэппиттэрэ. Бу сырыыбар Монголия бэрэсидьиэнин сүбэһитин таһымыгар оонньуулары ыытар тэрийэр кэмитиэт чилиэннэрин кытта санаа атастастыбыт, сүбэлэстибит. «Азия оҕолоро» Норуоттар икки ардыларынааҕы оонньуулары «Саха» НКИХ үлэһиттэрэ сырдатар кыахтарын, ньымаларын, хайысхаларын сиһилии билиһиннэрдим. Уопуттаах дьон быһыытынан кэпсиирбит үгүс буолан, монголлар бэркэ интэриэһиргээн иһиттилэр.
«Саха» НКИХ салайааччыта Олег Марков хампаанньа ис үлэтин, кыаҕын билиһиннэрээр соруктаах, Монголия Өрөспүүбүлүкэтин «MNB» национальнай тэлэбиидэнньэ салалтатын быйыл сайын Үс Хатыҥҥа буолар Туймаада Ыһыаҕар ыалдьыттата ыҥырбыт.
Елена ПОТОЦКАЯ, «Саха сирэ» хаһыат, edersaas.ru
Хаартыска — Олег Марков архыыбыттан.