Аммалар  бэргэн ытааччыны быһаардылар

Амма өрүс уҥуор сытар нэһилиэккэ Чакырга ситимнээх түөрт полковник бирииһигэр күрэхтэһии ыытылынна. Сонун тэрээһини үгэскэ кубулутар баҕа санаалаахтар. Пневматическай бэстилиэтинэн уонна бинтиэпкэнэн ытыыга 2002 — 2005, 2006- 2009 сыллаах төрүөх уолаттарга, кыргыттарга, эр дьоҥҥо уонна дьахталларга бастыҥнар ааттаннылар. 


Чакыр нэһилиэгэр СӨ Куттала суох буолуу экономическай отделын начаалынньыгын солбуйааччы Анатолий Карамзин, СӨ ис дьыалатын министиэристибэтин сулууспатын полковнига Петр Лазарев, СӨ  ис дьыалатын министиэристибэтин тус куттала суох буолуутун салалтатын начаалынньыга Геннадий Алексеев уонна СӨ ОДьКХ киин диспетчерскэй сулууспатын начаалынньыга Николай Иванов бириистэригэр ытыыга күрэхтэһии буолла.

Тэрээһин Чакыр оскуолатын учуутала уонна тренерэ Николай Захаров көҕүлээһининэн ыытылынна. Сайыҥҥы спортивнай Оонньууларга буулдьанан ытыы эмиэ киирэр сылдьарын быһыытынан спорт бу көрүҥэ кэскиллээҕин көрөн, Николай төрдүс сылын оҕолору дьарыктыыр. Иитиллээччилэрэ өрөспүүбүлүкэҕэ тиийэ ситиһиилээхтик кытталлар. Альберт Новиков аҕыйах хонуктааҕыта Чурапчы Хатылытыгар буолан ааспыт „Аҕа күрэҕэр“ ситиһиилээхтик кыттыбыта. Онтон бу күрэххэ бинтиэпкэнэн ытыыга аҕата Николай Новиков иккис, эбэтэ Елизавета Новикова чөмпүйүөн үрдүк аатын ыллылар. Сиэн кыыс Настя эмиэ кыайыылааҕынан таҕыста. Онон Новиковтар удьуор ытааччылар буолалларын итэҕэттилэр. Майскай орто оскуолатын дириэктэрэ Иван Макаров эмиэ оҕолору дьарыктаан өрөспүүбүлүкэҕэ бириистээх миэстэнэллэр. Кинилэр Чакырга   чаҕылхай кыайыылары ситистилэр. Соморсунтан ытыыга дьахталларга өрөспүүбүлүкэ хас да төгүллээх призера, оскуола учуутала Галина Кириллина бэйэтин маастарыстыбатын көрдөрдө. Өрөспүүбүлүкэҕэ биллэр Никита Баранов ытыынан дьарыктанар ааттаах — суоллаах Барановтар ааттарын бу да сырыыга түһэн биэрбэтэ.

Түмүккэ бэстилиэтинэн ытыыга кыраларга Степан Илларионов (Амма), Саргылана Свинобоева (Чакыр), улахаттарга Никита Баранов (Соморсун), Милена Шадрина (Чакыр), эр дьоҥҥо Николай Захаров (Чакыр), Галина Кириллина (Соморсун) чөмпүйүөн үрдүк аатын ыллылар.

Бинтиэпкэнэн ытыыга кыраларга  Дима Любчич (Покровка), Эвелина Павлова (Покровка), улахаттарга Альберт Новиков (Чакыр), Настя Новикова (Чакыр), эр дьоҥҥо Иван Макаров (Покровка), Елизавета Новикова (Чакыр) кыайыы өрөгөйүн биллилэр. „Кэскиллээх ытааччы“ диэн анал бириистэр Эвелина Павловаҕа, Милена Шадринаҕа, Никита Барановка туттарылынна.

Полковниктар ааттарыгар ыытыллыбыт күрэхтэһии үгэскэ киирэн, саҥаттан саҥа ааттары таһаара туруо диэн тэрийээччилэр эрэллэрэ улахан.

Ааптар Алтана Артемьева

Добавить комментарий

Ваш e-mail не будет опубликован. Обязательные поля помечены *