Баахынайдар балыктаатылар

Баахынай үрэх Иккис Сиилэс сиригэр, үгэс буолбут, «Серебряная блесна» муус аннынан күөгүнэн балыктааһын күрэҕэ ыытылынна. Кыстатыам, Эдьигээн, Баахынай нэһилиэктэрин олохтоохторо уопсайа 54 кыттааччылаах 18 хамаанданы туруордулар.


Баахынайга буолбут балыктааһыҥҥа ордук дьиэ кэргэттэр хамаанда туруорбуттара кэрэхсэннэ. Олор истэригэр Галина Ивановна Слепцова, элбэх оҕолоох Петровтар дьиэ кэргэттэрэ иккилии хамаанданы туруоран, оҕолорун, сиэннэрин илдьэ киирэн кыттыыны ыллылар. Күн-дьыл да туран биэрэн көрөөччүлэр, ыалдьааччылар тоҕуоруһа муһуннулар.

Хамаандалар бэриллибит бириэмэҕэ балыктыыр кэмнэригэр Ильинова Наталья Ивановна дьиэ кэргэнинээн балаакка туруоран, мустубут дьону итии чэйинэн, сылаас минньигэс аһынан күндүлээтилэр. Оттон Колтовской Сергей Сергеевич дьиэ кэргэнэ шашлык буһаран нэһилиэнньэни аһатта. «Сайдам»   ЭКК үлэһиттэрэ Елизавета Гаврильева уонна Татьяна Софронова минньигэс бириистэрдээх, оҕолорго аналлаах араас оонньуулары тэрийдилэр.

Сүрүн күрэх таһынан «Буран» көлөнөн сүүрдүү буолла, 7 эр бэрдэ тыҥааһыннаах киирсиилэрин түмүгүнэн, Софронов Яков иннин кимиэхэ да биэрбэтэ. Оттон муус аннынан балыктааһын күрэх түмүгүнэн бастыҥ балыксыттарга анал ааттар туттарылыннылар. Балыксыттар алыһары уонна борохойу түбэһэ туттулар. Ол курдук, «Аан бастакы балык» аакка, бастакынан балык хаптаран эмиэ Софронов Яков тиксэн үөрүү үтүмэнин биллэ. Григорьева Ксения Николаевна саамай ыйааһыннаах балыгы тутан — «Улахан балык» анал бириискэ тигистэ. Оттон саамай уопуттаах балыксытынан Слепцова Галина Иннокентьевна ааттанна.

Ойбону алларыыга сыалын аан бастакынан ситиһэн Петров Антон кыаҕын көрдөрдө. Оттон уопсай хамаанданан киирсиигэ элбэх балыгы хаптаран, Алексеев Андрей, Мусалямов Рустам, Петров Иннокентий, эр бэртэрин хамаандата кыайыы өрөгөйүн биллэ уонна Кубогынан наҕараадаланна. Софронов Вениамин уолаттарынаан Яковтыын уонна Васялыын иккис миэстэҕэ таҕыстылар. Оттон Андреев Семен кэргэнинээн Изабеллалыын уонна бырааттара Антонов Иванныын үһүc бириистээх миэстэҕэ тигистилэр. Хас биирдии үс бастыҥ миэстэлэргэ тиксибит кыттааччыларга мэтээллэр уонна спонсордар туруорбут сыаналаах бириистэр туттарылыннылар.

Кэрэ айылҕалаах Баахынай сиригэр ыраахтан-чугастан кэлбит дьон, биир өрөбүл күннэрин атаардылар.

Ааптар: Мария Аполлонова

Добавить комментарий

Ваш e-mail не будет опубликован. Обязательные поля помечены *