Мэҥэ Хаҥалас уолаттарын аармыйаҕа атаардылар

Мэҥэ Хаҥалас уолаттарын аармыйаҕа атаардылар

Мэҥэ Хаҥалас улууһуттан сааскы ыҥырыыга 40 уол аармыйаҕа барарга бэлэм. Доруобуйатын туруга үчүгэй. Байыаннай хамыһаар Аял Петров ирдэбил быһыытынан быйылгыттан саллааттарга интэриниэт ситимигэр тахсар төлөпүөн көҥүллэммэтин иһитиннэрдэ. Онон кэпсэтэр сибээһи эрэ хааччыйар боростуой төлөпүөннээх баралларыгар сүбэлээтэ.


Бу күннэргэ Мэҥэ Хаҥалас уолаттарын Арассыыйа аармыйатын кэккэтигэр атаарыы долгутуулаах түгэнэ буолла. Саҥа ирдэбиллри кытта байыаннай хамыһаар билиһиннэрдэ.

Геолокация нөҥүө интэриниэтинэн тугу кэпсэтэ сылдьаргыт барыта биллэ-көстө сылдьар буолан, смартфоннары тохтоттулар, ‒ диэтэ Аял Дмитриевич Петров. Уолаттарга эр киһи буолан, Ийэ дойдуга ытык иэһи толорон, этэҥҥэ сулууспалаан кэлэллэригэр баҕа санаатын эттэ.

СӨ байыаннай хамыһаарын бирикээһинэн «Афганистантан Сэбиэскэй буойуннар тахсыбыттара 30 сылынан» өйдөбүнньүк мэтээллэри бойобуой дьайыылар бэтэрээннэригэр Николай Кузьмиҥҥа, Иван Степановка, Егор Шариҥҥа, Петр Филипповка уонна Валерий Шариҥҥа туттарда. РФ Оборуонаҕа миниистирин бирикээһинэн «Восток ‒ 2018» мэтээллэринэн «Майа сэлиэнньэтэ» МТ баһылыга Дмитрий Тихонов, Афганистан сэриитин кыттыылааҕа, «Сахатранснефтегаз» Илин эҥэрдээҕи учаастагын салайааччыта Валерий Шарин уонна байыаннай комиссариат биэлсэрэ Алена Дмитриева наҕараадаланнылар.

Баҕа санааларын, алгыс тылларын улуус баһылыгын бастакы солбуйааччы Владимир Птицын, Майа сэлиэнньэтин баһылыга Дмитрий Тихонов, улуустааҕы дьиэ кэргэн дьыалаларыгар уонна ыччат бэлиитикэтигэр управлениетын салайааччыта Ирина Назарова, полиция мойуора Семен Баишев, улуустааҕы бэтэрээннэр сэбиэттэрин бэрэссэдээтэлэ Маргарита Максимова, бойобуой дьайыы кыттыылааҕа, өрөспүүбүлүкэтээҕи «Аҕа күрэҕэ ‒ 2019» кыайыылааҕа Вячеслав Соколов,  РФ, СӨ култууратын үтүөлээх үлэһитэ Василий Винокуров эттилэр.

Уолаттарга улуус гиэрбэтэ ойуулаах өйдөбүнньүк бэлэхтэри туттардылар. Эдэр армеецтар хамсааһыннарын иитиллээччилэрэ, В.П.Ларионов уонна Ф.Г.Охлопков аатынан Майа оскуолаларын үөрэнээччилэрэ, Елизавета Петрова эҕэрдэ нүөмэрдэри толордулар.

Ааптар: Виктория БЕЛОЛЮБСКАЯ. 

Добавить комментарий

Ваш e-mail не будет опубликован. Обязательные поля помечены *