Октябрьскай нэһилиэккэ сыбаалкаларын миэстэтин быһаарыстылар

Октябрьскай нэһилиэккэ сыбаалкаларын миэстэтин быһаарыстылар

Бүгүн, муус устар 30 күнүгэр, Октябрьскай нэһилиэккэ аһаҕас уопсастыбаннай истии буолан ааста. Ньурба куорат кытаанах хомунаалынай тобохторун харайар полигонун олоххо киллэрии туһунан кэпсэттилэр.


Октябрьскай нэһилиэк олохтоохторо, Ньурба улууһун салайааччылара, бу бырайыакка консультант быһыытынан үлэлэһэ сылдьар «Доринжиниринг» тэрилтэ бэрэстэбиитэллэрэ уо.д.а. кытыннылар. Улуус баһылыгын тутууга уонна ОДьКХ-ҕа солбуйааччыта Макар Семенов «Ыраас дойду» экологическай бырайыак чэрчитинэн федеральнай үп суотугар 2021 сылга Ньуккан сыбаалкатын рекультивацията барыахтааҕын, манна 761 мөл. солк. көрүллэрэ былааннанарын эттэ. Онуоха диэри өрөспүүбүлүкэ уонна улуус үбүгэр саҥа полигон оҥоһуллуохтааҕын иһитиннэрдэ.

2 ый устата элбэх үөрэтии үлэтэ ыытыллыбытын, пуорт көтөр-түһэр балаһатыттан 15 км тэйиччи буолуохтааҕын (сөмөлүөт түһэригэр-көтөрүгэр көтөрдөр мэһэйдээбэтиннэр диэн ирдэбиллээх), оҥоһуулаах суоллааҕын уонна чугаһынан уот линията барарын учуоттаан, бары өттүнэн Улуу Сыһыыттан Тойон Уйалаах диэки быһа киирэр суолга ойуур иһигэр 2 гааны көрдүүллэр. Эмиэ манна суол тутааччылар 6 гаалаах карьердара баарыгар салгыы кэҥэтиэхтээхтэр. Дьаама хаһыллар, кытаанах бөх араарыллан пресстэнэр уонна траншеяҕа уган буорунан көмүлэр.

Ньурба куораттан куһаҕан уу аҕалан кутуллубат, 2020-2021 с.с. үлэҕэ киирэр КОС тутулуннаҕына ол нөҥүө аһардыллан, тиэхиньиичэскэй уу таһымыгар диэри ыраастанан, Нефтебаза анараа өрүскэ түһэриллиэхтээх. КОС тутуутугар эмиэ уопсастыбаннай аһаҕас истии тэриллиэҕэ.

Оттон саҥа полигону Ньурбачаан өттүгэр тутар буоллахха, аҥардас суолун оҥоруутугар 150 кэриҥэ мөл. солк. барар, аны өссө уота тардыллара наада.

Октябрьскай нэһилиэк баһылыга Семен Корякин, улуус баһылыга Алексей Иннокентьев, «Доринжиниринг» тэрилтэ бэрэстэбиитэлэ Валентин Петров иһитиннэрии оҥордулар, ыйытыктарга хоруйдаатылар. Кэпсэтии сытыытык барда, сорохтор Саалтааны эбэтэр Ньурбачаан диэки полигону тутарга этии киллэрдилэр. Ол эрээри үгүс тыл эппиттэр сыбаалка тирээн турар сытыы кыһалҕата хайаан да быһаарылларын туһугар бу бырайыакка сөбүлэһэр наадатын, рекультивацияҕа элбэх туруорсуунан ситиһиллибит үбү-харчыны туһанар, сири көҥүллүүр наадатын ыйдылар.

Мунньах кыттыылаахтарын үксүлэрэ бырайыакка сөбүлэһэн куоластаатылар. 4 киһи утарда, 8 киһи туттунна.

Ааптар: Геннадий Антонов.

Добавить комментарий