Нам улууһун хас биирдии нэһилиэгэ Олоҥхо ыһыаҕар тус кылаатын киллэрсэр

Нам улууһун хас биирдии нэһилиэгэ Олоҥхо ыһыаҕар тус кылаатын киллэрсэр

Олоҥхо ыһыаҕын көрсө, Нам улууһун киинигэр, хас биирдии нэһилиэк кэнсиэр көрдөрөн, билиэттэринэн сүүйүү оонньотон, киирбит үбү-харчыны ыһыаҕы өйүүр улуустааҕы фондаҕа туттарар. Ол курдук ааспыт нэдиэлэҕэ Бартыһаан нэһилиэгин Олоҥхо ыһыаҕын уруйдуур-айхалыыр кэнсиэрэ буолла.


Бартыһаан нэһилиэгин талааннаах дьонун-сэргэтин дьоро киэһэтэ билиэттэри тэҥнииртэн саҕаланна. Сүүйбүттэргэ эгэлгэ барыанньа, үүт ас арааһа, уран тарбахтаахтар оҥоһуктара уонна да атын бириистэр тигистилэр. Маппыттар дьон үөрбүт-көппүт харахтарын эрэ көрөн хааллыбыт. “Сардаҥа” кинотеатр саалатыгар толору киһи мустан, кэнсиэр бириэмэтигэр саҕаланна. Тэрээһин “Арчы” үҥкүүнэн уонна “Дьүрүл” фольклорнай ансамбль эдэр көлүөнэ ырыаһыттарын “Алгыс ырыатынан” аһылынна. М. Аргунова салайааччылаах Венгрияҕа, Сербияҕа ыытыллыбыт аан дойдутааҕы фольклорнай фестиваллар кыайыылааҕа “Дьүрүл” ансамбль дьон кутун тутта.

Нэһилиэк баһылыга Алексей Зырянов махталын тиэрдэн туран, кэргэнэ Татьяналыын Эдьиий Марыына репертуарыттан “Үчүгэй, үчүгэй” ырыанан эҕэрдэлээбиттэрэ сонуннук көһүннэ. “Сайбай” бөлөх көрдөөх-күлүүлээх чабырҕахтарын, “Дьүрүл” ансамбль “Айылҕа дуораана” хомуска дьүһүйүүлэрин үрдүк таһымҥа толордулар.

Нуучча улуу суруйааччыта Антон Чехов “Театр – искусство үрдүк чыпчаала” диэн айымньытынан туруоруллубут спектакль режиссурата, толоруута, көстүүмнэрэ олус табыллыбыттар. Хас биирдии оруол чаҕылхайдык арылынна. СР культуратын туйгуннара Семен Алексеев уонна Людмила Рехлясова “Дойдум дьоно”, “Хомус” фольклор дьиэтин кэрэ куолара “Ырыа-мин дьолум” диэн абылаҥнаах ырыалара, Кытай республикатыгар ыытыллыбыт фестиваль 2-с миэстэлээх призердара “Арчыһыттар” бөлөх нууччалыы үҥкүүтэ дьон-сэргэ дууһатын долгуттулар, санаатын аралдьыттылар. Нэһилиэк киэн туттар талааннаах ыччата Ньургууна Николаева, Нария Турантаева, Татьяна Афанасьева, Арина Винокурова сааскы ылааҥы күнүнэн сайаҕас ырыаларын бэлэхтээтилэр. СР үтүөлээх артыыһа Анастасия Готовцева уонна Семен Алексеев ырыаларын көрөөччүлэр дохсун ытыс тыаһынан көрүстүлэр.

Кэнсиэри “Дьүрүл” бастакы бөлөҕүн төрүттэспит, сцена ветерана Николай Феоктистов төрөппүт кыыһа, “Вести-Саха” биэрии ыытааччыта Ньургуяна Феоктистова уонна “Дьүрүл” народнай ансамбль салайааччыта Владимир Колесов бэркэ иилээн-саҕалаан ыыттылар. Кэнсиэр олус тэтимнээхтик, өрө көтөҕүллүүлээхтик баран, дьон хайҕалын, махталын ылла. Манна Бартыһааҥҥа саха фольклора чэчирии сайдыбыта, эдэр көлүөнэни өбүгэлэрбит уус-уран айымньыларыгар уһуйуу ситимнээхтик барбыта өтө көһүннэ. Онуоха Анастасия Готовцева “Эрэл” народнай ансамбылга бииргэ айбыт-туппут доҕоро, “Хомус” СК директора Семен Алексеев ыҥырыытын ылынан кэлэн, ыллаабыта-туойбута элбэҕи быһаарда. Талааннаах артыыс иһирэх ырыаларын истээри үгүс көрөөччү кэлбитэ өтө сэрэйиллэр. “Саха” НКИХ хампаанньа диктора, талааннаах журналист Ньургуяна Феоктистова биир дойдулаахтарын өйөөн, үлэтиттэн быыс булан, кэнсиэри ыытыспыта тэрээһин таһымын өссө үрдэттэ. Маныаха нэһилиэк баһылыга Алексей Зырянов дьиэ кэргэнинээн саха норуотун тапталлаах ырыаһыта Эдьиий Марыына сырдыкка, кэрэҕэ ыҥырар ырыатын кэнсиэр аһыллыытыгар толорбуттара бар дьону кэрэхсэттэ.

Онон бартыһааннар кэнсиэрдэрэ эрдэттэн рекламата кыаллан, ис хоһоон, көстүү өттүнэн сөпкө аттарыллан, үгүс көрөөччүнү хапта. Бу күн 38500 солк. суумалаах үп-ас ыһыах фондатыгар киирдэ.

Ааптар: Анастасия КОРЯКИНА

Добавить комментарий

Ваш e-mail не будет опубликован. Обязательные поля помечены *